05.05.2020: Amakuru mashya kuri Coronavirus mu Rwanda

Minisiteri y’Ubuzima yatangaje ko nta murwayi mushya wa Coronavirus wabonetse mu bipimo 896 byafashwe uyu munsi, mu gihe umuntu umwe yasezerewe mu bitaro bituma umubare w’abamaze gukira ugera ku 129.

Itangazo rya Minisante ryo kuri uyu wa Kabiri, tariki ya 5 Gicurasi 2020, ryagaragaje ko nta murwayi mushya wabonetse, byatumye umubare w’abamaze kwandura Coronavirus mu Rwanda uguma kuri 261.

Abanduye ni 261 (Nta mushya wabonetse mu bipimo 896 by’uyu munsi)
Abakize ni 129 (barimo umwe mushya)
Abakirwaye ni 132
Nta muntu uritaba Imana
Ibipimo bimaze gufatwa ni 35 992

Ku wa 14 Werurwe 2020 nibwo u Rwanda rwemeje ko umurwayi wa Mbere wa Coronavirus yageze mu gihugu, yari Umuhinde wari uturutse mu Mujyi wa Mumbai. Uhereye icyo gihe hamaze gutahurwa abarwayi 261. Muri bo 129 bamaze gukira, naho 132 baracyari kwitabwaho n’abaganga.

Imibare ya Minisiteri y’Ubuzima igaragaza ko kugeza kuri uyu wa Mbere hari hamaze gufatwa ibipimo 35 096; aho abamaze gutahurwaho ubwandu baherereye mu turere 13 tw’u Rwanda, bivuze ko hari utundi 17 tutarageramo icyorezo cya COVID-19 iterwa n’agakoko gashya ka Coronavirus.

Ahamaze gutahurwa ubwandu bwinshi ni mu Karere ka Kirehe hagaragaye abantu 101 banduye Coronavirus, hagakurikiraho aka Bugesera gafite 47, Gasabo ifite 39, Kicukiro na 38 na Nyarugenge ifite 25.

Mu bantu bose banduye, abaturukanye Coronavirus hanze ni 169, naho 92 bahuye n’abavuye hanze baranduye. Mu banduye bose hamwe, abagabo ni 206 bangana na 78.93 ku ijana, abagore ni 55, bangana na 21.07%.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 3 706 206 bamaze kuyandura ku Isi yose, barimo 256 556 yahitanye na 1 228 106 bamaze kuyikira.

@igicumbinews.co.rw