06.11.2020: Amakuru mashya kuri Coronavirus mu Rwanda

Minisiteri y’Ubuzima yatangaje ko abantu 16 banduye Coronavirus mu Rwanda mu bipimo 1333 byafashwe uyu munsi mu gihe 13 aribo basezerewe nyuma yo gukira.

Itangazo rya Minisante ryo kuri uyu wa Gatatu rigaragaza ko abarwayi bashya bakuwe muri Kirehe:6, Nyagatare:6, Rubavu:2 na Rusizi:2.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze kuboneka 5208 banduye mu bipimo 566 009, abagera ku 4953 barayikize mu gihe 220 bakitabwaho n’abaganga naho 36 bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.