15.05.2020: Amakuru mashya kuri Coronavirus mu Rwanda

Ku nshuro ya kabiri yikurikiranya nta murwayi mushya wa Coronavirus wabonetse ku butaka bw’u Rwanda byatumye umubare w’abayanduye uguma kuri 287, mu gihe abakize bageze ku 177.

Minisiteri y’Ubuzima yatangaje ko nta murwayi mushya wa Coronavirus wabonetse mu bipimo 1058 byafashwe kuri uyu wa Gatanu, mu gihe abantu icyenda basezerewe mu bitaro bituma umubare w’abamaze gukira ugera ku 177.

Mu Rwanda hamaze gufatwa ibipimo bingana na 46 198, hatahuwemo abantu 287 banduye; muri bo 177 ‘barimo icyenda bashya’ basezerewe mu bitaro nyuma yo gusuzumwa bagasangwa nta virusi bagifite mu mibiri yabo.

Umurwayi wa mbere wanduye Coronavirus yabonetse mu Rwanda ku wa 14 Werurwe 2020. Kuva icyo gihe ni ubwa mbere hashize iminsi ibiri yikurikiranya nta murwayi mushya uboneka mu bipimo bifatwa.

Mu bipimo 895 byafashwe ku wa Kane nabwo nta murwayi wasanganywe icyorezo cya COVID-19 giterwa n’agakoko gashya ka Coronavirus.

Kuri ubu ibitaro byita ku barwayi ba Coronavirus mu Rwanda biri kubarizwamo 110, bameze neza kuko nta n’umwe urembye.

U Rwanda ruri mu bihugu bitarapfusha umuntu n’umwe, ndetse nta nurashyirwa mu cyumba cyagenewe kwita ku ndembe za Coronavirus.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 587 109 bamaze kuyandura ku Isi yose, barimo 306 119 yahitanye na 1 735 617 bamaze kuyikira.

@igicumbinews.co.rw