15.10.2020: Amakuru mashya kuri Coronavirus mu Rwanda

Minisiteri y’Ubuzima yatangaje ko kuri uyu wa Kane abantu 203 bakize COVID-19 mu Rwanda mu gihe 13 aribo bayisanzwemo mu bipimo 2080 byafashwe.

Abarwayi 13 bashya basanganywe COVID-19 barimo umwe wo mu Mujyi wa Kigali, batandatu b’i Kirehe, batanu b’i Karongi barimo amatsinda y’abapimwe mu nkambi z’impunzi ndetse n’umwe wakuwe i Nyagatare.

Kuva umurwayi wa mbere wa COVID-19 iterwa n’agakoko ka Coronavirus igaragaye mu Rwanda, abantu 4953 bamaze kwandura; abayikize ni 4601 mu gihe abacyitabwaho ari 319. Abamaze kwitaba Imana ni 33.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.