17.05.2020: Amakuru mashya kuri Coronavirus mu Rwanda

Abantu 19 bakize Coronavirus basezererwa mu bitaro mu gihe mu bipimo 1135 byafashwe kuri uyu wa 17 Gicurasi 2020 abarwayi batatu basanganywe iki cyorezo, byatumye umubare w’abanduye ugera kuri 292.

Ni ku nshuro ya mbere, umubare w’abantu benshi wasezerewe mu bitaro kuva umuntu wa mbere wanduye Coronavirus mu Rwanda agaragaye ku wa 14 Werurwe 2020.

Mu Rwanda abamaze gukira icyorezo cya COVID-19 giterwa n’agakoko ka Coronavirus kugeza ubu ni 197 barimo 19 basezerewe uyu munsi.

Abanduye ni 292 (Batatu bashya)
Abakize ni 197 (19 bashya)
Abakirwaye ni 95
Nta murwayi uritaba Imana
Ibipimo bimaze gufatwa ni 49 374 (ibipimo bishya 1135)

Umubare w’abantu bakize niwo munini w’abasezerewe mu bitaro umunsi umwe kuva aba mbere basezerewe ku wa 5 Mata 2020.

Kuri ubu umubare w’abari mu bitaro uri munsi y’ijana [95], imibare yaherukaga mu ntangiriro za Mata 2020.

Bitandukanye no mu minsi yashize ubwo humvikanaga ko umuntu wanduye yasanzwe muri ‘quartier’ runaka nk’uko byagenze mu Gatenga cyangwa i Gicumbi, uwanduye akajyanwa mu bitaro n’abo bahuye bagashyirwa mu kato. Abarimo gusangwamo ubwandu ni abafatirwa ku mupaka, bagashyirwa mu kato, bagapimwa.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Umuntu wese ashobora kwipimisha akoresheje telefoni akanda *114# agakurikiza amabwiriza. Ugaragaza ibimenyetso bya Coronavirus asabwa guhamagara telefoni itishyurwa ya 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.

Ishami ry’Umuryango w’Abibumbye ryita ku Buzima (OMS) ryemeje ku wa 11 Werurwe 2020 ko Coronavirus ari icyorezo cyugarije Isi bitewe n’ubwiyongere bw’abayandura.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 772 716 bamaze kuyandura ku Isi yose, barimo 315 189 yahitanye na 1 844 162 bamaze kuyikira.

@igicumbinews.co.rw