Rulindo: Umurenge wa Tumba ugiye guhangana n'uwa Base ku mu mukino wa nyuma muri Kagame Cup

Umurenge wa Tumba wageze ku mukino wa nyuma w’Umurenge Kagame Cup ku nshuro ya mbere, aho ugiye gucakirana na Base nayo yakomeje bitoroshye

Kuri uyu wa Gatatu, tariki ya 29 Mutarama 2025, mu Karere ka Rulindo habaye imikino y’Umurenge Kagame Cup. Amakipe yitabiriye aya marushanwa yari yiteguye bihagije, haba mu bagabo no mu bagore. Gusa, umukino wari utegerejwe cyane mu bagabo ni uwo wahuje Umurenge wa Tumba na Burega. Uyu mukino wakiniwe ahitwa Nyirabirori, urangira amakipe yombi anganyije igitego 1-1. Nyuma y’iminota isanzwe, hitabajwe penaliti maze Tumba itsinda Burega kuri penaliti 5-4, ibona itike yo gukina umukino wa nyuma.

Ku rundi ruhande, Umurenge wa Base wahuye na Shyorongi mu mukino wari urimo ishyaka ryinshi. Aya makipe nayo yanganyije igitego 1-1, bituma hiyambazwa penaliti. Base yatsinze kuri penaliti 5-3, isanga Tumba ku mukino wa nyuma.

Abaturage ba Tumba mu byishimo bikomeye

Nyuma yo kubona itike yo gukina umukino wa nyuma bwa mbere mu mateka y’irushanwa, abakinnyi, abayobozi ndetse n’abaturage bo mu Murenge wa Tumba bizihije iyi ntsinzi mu karasisi katatinze. Abaturage bagaragaje ibyishimo byabo, bishimira intambwe ikipe yabo yateye. Mu kiganiro yagiranye n’umunyamakuru wa Igicumbi News, bamwe mu bakinnyi ba Tumba batangaje ko bishimiye intsinzi, ariko ko bagifite intego yo gutwara igikombe kugira ngo baheshe ishema Umurenge wabo.

Team Manager w’Umurenge wa Tumba, Hirwa Julidas, mu byishimo byinshi yavuze ko kuba bageze ku mukino wa nyuma ari umugisha, kandi bafite intego yo kwegukana igikombe. Ati: “Turishimye, twanezerewe iwacu, kuko ubu Tumba yose ni akanyamuneza. Twakoze ibyo dushoboye none tugeze ku munota wanyuma. Twaritanze bishoboka kandi twizeye ko n’igikombe tuzagiha abatuye i Tumba, maze tubashe guhagararira Akarere kacu neza. Base ntabwo iduteye ubwoba cyane kuko natwe turi ikipe ikomeye, tuzakora ibishoboka byose.”

Umurenge wa Base nawo witeguye guhatana

Ku rundi ruhande, Umurenge wa Base wahuye na Shyorongi, imwe mu makipe yari akomeye muri iri rushanwa. Nyuma yo kunganya igitego 1-1, Base yakomeje kuri penaliti 5-3. Bivuze ko umukino wa nyuma uzahuza abaturanyi, Base na Tumba.

Mu kiganiro yagiranye na Igicumbi News, Habimana Dieudonné uzwi ku izina rya Dioko, yavuze ko intego yabo ari igikombe, nubwo Umurenge wa Tumba ushobora kubaha akazi gakomeye. Ati: “Nibyo, twageze ku mukino wa nyuma. Nk’uko nabivuze, intego yacu ni igikombe, tugomba kukibona. Abatuye Umurenge wa Base bahora batwereka ko badushyigikiye, rero tuzaharanira kubashimisha.”

Umukino wa nyuma utegerejwe ku Cyumweru

Imikino ya nyuma y’Irushanwa ry’Umurenge Kagame Cup mu Karere ka Rulindo izaba ku Cyumweru, tariki ya 02 Gashyantare 2025, ku kibuga cya Shyorongi. Ikipe izatwara igikombe mu bagabo no mu bagore izahagararira Akarere ka Rulindo ku rwego rw’Intara y’Amajyaruguru.

Nk’uko byatangajwe na Bwana Muvara Valens, ushinzwe siporo mu Karere ka Rulindo, ibiganiro birakomeje kugira ngo iyi mikino izatambuke Live kuri website na YouTube bya Igicumbi News Group Media LTD.

Emmanuel Niyonizera Moustapha / Igicumbi News