23.06.2020: Amakuru mashya kuri Coronavirus mu Rwanda

Minisiteri y’Ubuzima yatangaje ko abantu 11 basanganywe Coronavirus mu bipimo 4568 byafashwe uyu munsi, abayanduye mu Rwanda bagera kuri 798 mu gihe abakize biyongereyeho umwe bituma abamaze gusezererwa mu bitaro baba 371.

Abanduye ni 798 (Barimo 11 bashya)
Abakize ni 371 (Barimo 1 mushya)
Abakirwaye ni 425
Abantu babiri bamaze kwitaba Imana
Ibipimo bimaze gufatwa ni 118 112 (Ibipimo bishya 4568)

Itangazo rya Minisante ryo kuri uyu wa 23 Kamena 2020 rigaragaza ko abarwayi bashya basanganywe ubwandu bwa Coronavirus bagaragaye mu duce dutatu dutandukanye mu gihugu.

Rikomeza rivuga ko ‘‘Abarwayi bashya bagaragaye i Rusizi (8), Kigali (1), Kirehe (2).’’

Muri iyi minsi ubwandu bushya bwiganje mu Turere twa Rusizi na Kirehe, aho bufitanye isano n’ingendo zambukiranya imipaka.

Kuva umurwayi wa mbere wa Coronavirus agaragaye mu Rwanda ku wa 13 Werurwe 2020, hamaze kuboneka 798 banduye mu bipimo 1018 112 bimaze gufatwa, 371 barayikize mu gihe 425 bakiri kwitabwaho n’abaganga; babiri barimo umushoferi w’imyaka 65 n’umupolisikazi bitabye Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

@igicumbinews.co.rw