Ubwongereza: Abantu 7 bapfuye nyuma yo guterwa urukingo rwa AstraZeneca

Abantu barindwi nibo bamaze gupfa mu Bwongereza kubera kuvura kw’amaraso yabo kwabaye nyuma y’aho baterewe urukingo rwa AstraZeneca, nk’uko bivugwa n’ikigo gishinzwe imiti muri icyo gihugu.

Kugeza ku wa 24 z’ukwa gatatu, mu bantu bangana na miliyoni 18 bari bamaze guhabwa uru rukingo, 30 muri bo nibo bagize iki kibazo cyo kuvura kw’amaraso.

Hagati aho, ishami rya ONU rishinzwe ubuzima kw’isi OMS/WHO hamwe n’ishyirahamwe ry’u Burayi rishinzwe imiti, bombi bavuze ko inyungu z’uru rukingo ziruta kure ingaruka rushobora guteza.

Umuvugizi wa AstraZeneca yagize ati: “Ubuzima bw’umurwayi nicyo kintu dukomeza gushyira imbere”.

Abahanga hamwe n’abashinzwe gusuzuma imiti ku isi barimo kureba niba uru rukingo ari rwo koko rutera iri vura ry’amaraso, urugero bishobora kuba, n’ingaruka ku mugambi wo gukingira.

Aya makenga niyo yatumye ibihugu bimwe na bimwe birimo Ubudage, Ubufaransa, Ubuholande hamwe na Canada, bifata ingamba ko uru rukingo ruhabwa abasaza n’abakecuru gusa.

Imibare yashyizwe hanze n’ikigo gishinzwe gusuzuma imiti mu Bwongereza MHRA yerekana ko abantu 22 aribo bagize ikibazo cy’ivura ry’amaraso mu bwonko, kizwi nka thrombose du sinus veineux cérébral (cyangwa cerebral venous sinus thrombosis,CVST).

Hari abandi umunani nabo basanze bafite ibimenyetso bishobora gutuma amaraso yabo avura.

Mu butumwa bwa e-mail ikigo MHRA cyahaye BBC, cyatangaje ko “abantu barindwi bapfuye”.

Iki kibazo kandi cyamaze kugaragar no mu Budagi, aho abantu 31 ari bo bagize ikibazo cyo kuvura kw’amaraso, icyenda bakaba barapfuye, mu bantu miliyoni 2.7 bahawe urukingo rwa AstraZeneca, abenshi muri bo bakaba ari abagore bakiri bato. Iki nicyo cyatumye ku munsi wa kabiri w’iki cyumweru leta ifata umwanzuro wo kureka kurutera abakiri bato.

Kugeza ubu, ntibiramenyekana niba uru rukingo arirwo rutera iki kibazo cyo kuvura kw’amaraso gusa mu ntangiriro z’iki cyumweru,ikigo gishinzwe imiti ku mugabane w’u Burayi (EMA) cyavuze ko nta kibyemeza ariko bishoboka.

Source: BBC

@igicumbinews.co.rw