Abantu bashobora guterwa urushinge rwa kane rwa Coronavirus

Ubushakashatsi butandukanye bwagiye bukorwa mu minsi micye ishize bwagaragaje ko guterwa inshinge ebyiri za Coronavirus bidakingira ubwandu bushya bwa COVID-19 bwihinduranyije bwise Omicron.

Ikinyamakuru cyandika k’ubuzima Helathline, kivuga ko kuri ubu mu bihugu bitandukanye byatangiye gutera abantu urushinge rwa 3 rwa COVID-19, nubwo hataramenyekana niba ubwirinzi zitanga bushobora kumara igihe.

Inzobere mu gukora inkingo zivuga ko kugirango haboneke ubwirinzi busesuye bikwiye ko abantu baterwa urukingo rwa kane.

Umuyobozi mukuru w’uruganda rukora urukingo rwa Pfizer, Albert Bourla, mu cyumweru gishize yabwiye Televiziyo yo muri Amerika CNBC, ko urukingo rwa kane rukenewe kubera ko Omicron ifite ubukana burenze ubwirinzi butangwa n’urukingo.

Ashimangira ko rukenewe byihutirwa.

Ati: “Nitubona imibare ya nyayo y’abandura ku isi nibwo tuzamenya niba urukingo rwa gatatu rwafasha mu guhangana na Omicron. Icya kabiri, ndatekereza ko tuzakenera urukingo rwa kane”.

“Hamwe na Omicron dukwiye gutegereza tukareba kuko tuyifiteho amakuru macye cyane”.

Nubwo urukingo rwa kane rurimo kuvugwa, Ishami ry’Umuryango w’abibumbye ryita k’Ubuzima(OMS), ntiriremeza k’umugaragaro ibijyanye no gutanga inkingo zo gushimangira(Izirenze inkingo 2).

Ikindi kikibazwaho n’umwanya umuntu agomba kumara kugirango bamutere urushinge rwa Coronavirus rwa kabiri cyangwa urwo gushimangira.

Dr.Monica Gandhi, inzobere mu kurwanya indwara z’ibyorezo akaba anigisha muri Kaminuza ya California, San Fransisco, avuga ko gufata urushinge rwa mbere rwa Coronavirus, ugahita ufata urundi haciyemo igihe gito bigabanya ubudahangarwa.