Gatsibo: Abaturage bakubise abajura umwe arapfa

Ahagana saa saba zo mu rukerera rwo ku wa kabiri tariki 17 nzeri 2024, mu Mudugudu wa Kirara, Akagari ka Kintu, Umurenge wa Kageyo wo mu Karere Ka Gatsibo, humvikanye inkuru y’Agatsiko k’Abajura biba amatungo baturutse mu Karere baturanye ka Gicumbi baje kwiba amatungo aho bafashwe bagakubitwa umwe akahasiga ubuzima.

Umwe mu baturage waganiriye na www.igicumbinews.co.rw, yavuze ko abo bajura bari basanzwe barabigize umwuga aho biba amatungo bakajya kuyagurishiriza iwabo mu Karere Ka Gicumbi.

Umwe mu baturage. Yagize ati: “Mu gihe cyo mu ma saa saba z’ijoro nibwo abo bajura bateye umudugudu wa Kirara, bahageze barabanza bajya mu rugo rw’Umugabo witwa Nsabimana bitewe n’uko yacuruzaga ihene baraza mu mbuga, umwe arahinjira akingura urugi kugira ngo ahite abona uko azishorera, ubwo Umugore aba arabyumvise.

“Umusore amwumvise akangura Umugabo, babyutse basanga ni Umuhungu muremure wari wambaye ishati y’igitare arimo gusohora ihene, maze bahita bazigarura undi nawe arirukanka”.

MUKAMANA Marceline Umuyobozi w’Akarere ka Gatsibo wungirije ushinzwe imibereho myiza y’abaturage yabwiye igicumbinews.co.rw ko ayo makuru ntayo yamenye. Mu magambo make. Yasubije ati: “Ntacyo mbiziho cyakoze niba hari amakuru mufite mwayaduha umuntu agakurikirana”.

Amakuru avuga ko umwe muri aba bajura yaje kuhasiga ubuzima nyuma yo gukubitwa n’abari batabaye bari bamaze kumva induru zitabaza. Umwe muri ako gatsiko k’abajura yakubiswe bikomeye agera aho ajyanwa kwa Muganga ariko yageze mu nzira ahita apfa. Abajura batatu nibo bamenyekanye ko aribo bari baje kwiba mu magambi utabahiriye.

Abaturage bo muri ako gace bavuga ko aba bajura atari ubwa mbere babiba kuko babigize umwuga. Aho baza bitwikiriye ijoro baturutse mu Karere ka Gicumbi Maze bakaza gusahura muri aka Karere Ka Gatsibo.

Evariste NSENGIMANA/Igicumbi News