Rayon Sports yanyagiye Intare FC, Gicumbi FC inganya n’ikipe yo mu cyiciro cya 2
Rayon Sports yanyagiye Intare FC ibitego 4-0 mu mukino w’ijonjora ry’ibanze ry’igikombe cy’Amahoro.
Rayon Sports yari yakiriye Intare FC yo mu cyiciro cya kabiri, yashakaga impamba ihagije ku buryo umukino wo kwishyura uzayorohera, byatumye imanura intwaro za yo zose guhera ku munyezamu Kimenyi Yves kugeza kuri ba rutahizamu barimo Sugira na Dagnogo wakinaga umukino we w’irushanwa wa mbere nk’umukinnyi wa Rayon Sports.
Rayon Sports yatangiye isatira cyane maze ku munota wa 9 ihita inabona igitego gitsinzwe na Dagnogo ku mupira wari uvuye muri koruneri.
Yakomeje kotsa igitutu Intare FC maze ku munota wa 15, Sugira Ernest atsinda igitego cya 2 ku mupira Dagnogo yateye mu izamu ariko ntugereyo ugahura na Sugira agahita atsinda.
Ku munota wa 33 Rayon Sports yatsinze igitego cya gatatu ku ishoti Dagnogo yateye mu izamu ariko umunyezamu akarikuramo umupira ugahura na Sekamana Maxime wahise atsinda igitego cya 3. Igice cya mbere kirangira ari 3-0.
Mu gice cya kabiri Intare FC yageraje gukina ariko wabonaga idateye ubwoba Rayon Sports.
Rayon Sports wabonaga n’ubundi irusha Intare FC yaje kubona igitego cya kane ku munota wa 63 gitsinzwe na Mugisha Gilbert wari winjiye mu kibuga asimbuye Dagnogo. Ni ku mupira yacomekewe na Amran agasiga ba myugariro b’Intare FC. Umukino warangiye ari 4-0.
Dore uko imikino ibanza y’ijonjora ry’ibanze ry’igikombe cy’Amahoro cya 2020 yagenze
Ku wa Kabiri tariki ya 4 Gashyantare 2020
Mukura VS&L 2-1 Bugesera FC (Huye Stadium, 15h:00’)
AS Muhanga 5-0 Interforce FC (Muhanga Stadium, 15h:00’)
APR FC 1-0 Etoile de l’Est (Kigali Stadium, 15h:00’)
Gorilla FC 3-1 Marines FC (Kicukiro Stadium, 15h:00’)
Espoir FC 0-1 Sunrise FC (Rusizi Stadium, 15h:00’)
Musanze FC 1-0 Police FC (Ubworoherane Stadium, 15h:00’)
Ku wa Gatatu tariki ya 3 Gashyantare 2020
Rayon Sports FC 4-0 Intare FC (Kigali Stadium, 15h:00’)
SC Kiyovu 0-0 AS kigali (Mumena Stadium, 15h:00’)
Rutsiro FC 2-0 Pepiniere FC (Rutsiro Pitch, 15h:00’)
Impeesa FC 1-0 Etincelles FC (Camp Kigali, 15h:00’)
ASPOR LTD 2-1 Vision FC (Shyorongi Pitch, 15h:00’)
Rwamagana FC 2-2 Gicumbi FC (Rwamagana Police Pitch, 15h:00’)
@igicumbinews.co.rw
About The Author
