Uganda: Abandi bantu 8 babasanzemo Coronavirus

Minisiteri y’Ubuzima muri Uganda yatangaje ko muri icyo gihugu habonetse abandi barwayi umunani bashya ba COVID-19, umubare w’abamaze kumenyekana bagaragayeho icyo cyorezo uhita ugera ku bantu icyenda.

Ku wa Gatandatu tariki 21 Werurwe 2020 nibwo Leta ya Uganda yemeje ko muri icyo gihugu hagaragaye umuntu wa mbere wanduye icyorezo cya Coronavirus.

Uwo ni umugabo w’Umunya-Uganda w’imyaka 36 utuye mu gace ka Kibuki mu murwa mukuru Kampala, wageze muri Uganda kuri uwo munsi aturutse i Dubai, akaba yari mu ndege ya Kompanyi ya Ethiopian Airlines.

Kuri uyu wa mbere tariki 23 Werurwe 2020 nibwo Uganda itangaje ko habonetse abandi umunani, bose bakaba ari abanya-Uganda baheruka gukorera ingendo i Dubai muri Leta zunze ubumwe z’Abarabu (UAE).

Babiri muri bo bageze muri Uganda bavuye i Dubai ku wa gatanu w’icyumweru gishize, hari ku itariki ya 20 Werurwe 2020, abandi batandatu bagarutse muri Uganda ku cyumweru tariki 22 Werurwe 2020, bose baturutse i Dubai, bakaba baraje mu ndege z’ikompanyi ya Emirates na Ethiopian Airlines.

@igicumbinews.co.rw