Rwanda: Abandi bantu babiri bishwe na Coronavirus

Abantu babiri bo mu Karere ka Rwamagana bishwe na COVID-19 mu gihe mu bipimo 2974 byafashwe kuri uyu wa 10 Ugushyingo 2020, abagera kuri 20 banduye iki cyorezo giterwa n’agakoko ka Coronavirus.

Minisiteri y’Ubuzima yihanganishije imiryango y’abagabo babiri bitabye Imana barimo uw’imyaka 45 n’ufite 50 bo muri Rwamagana.

Ni ku munsi wa kabiri wikurikiranya mu Karere ka Rwamagana hatangajwe abantu babiri bitabye Imana.

Minisitiri w’Ubutegetsi bw’Igihugu, Prof Shyaka Anastase, aheruka gutangaza ko abaturarwanda nibakomeza kwirara, bishoboka ko mu minsi mike iri imbere basubizwa muri guma mu rugo, mu gihe icyorezo cya COVID-19 cyaba cyongeye gukaza umurego.

Kuri uyu wa Kabiri, Minisante yatangaje ko abagera kuri 20 basanzwemo Coronavirus mu bipimo 2974 byafashwe, mu gihe nta n’umwe wakize.

Abarwayi bashya bagaragaye muri Kigali:13 (abapimwe mu bibasiwe kurusha abandi), Muhanga:3, Nyanza:1, Rubavu:2 na Rwamagana:1.

Kuva ku wa 14 Werurwe 2020, ubwo umurwayi wa mbere yabonekaga mu Rwanda, hamaze gufatwa ibipimo 574 876; muri byo abantu 5262 basanzwemo ubwandu mu gihe abagera ku 4967 bayikize. Kuri ubu abarwayi 255 ni bo bakiri kwitabwaho mu gihe 40 bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.