Abakinnyi n’abakozi ba Rayon Sports bapimwe Coronavirus
Abayobozi bashya ba Rayon Sports bapimishije abakinnyi n’abakozi COVID-19 kuri uyu wa Gatandatu mbere yo gutangira umwiherero kuri uyu wa Mbere.
Iki ni cyo gikorwa Komite nshya ihereyeho nyuma y’uko yahawe ububasha na Komiti y’inzibacyuho ku wa Gatanu w’iki Cyumweru.
Kuri uyu wa Gatandatu tariki 31 Ukwakira abakinnyi n’abakozi ba Rayon Sports, bapimwe icyorezo cya COVID-19 mu gikorwa cyabereye ku biro by’ikipe biherereye Kimihurura muri Kigali.
Biteganyijwe ko abakinnyi bose ba Rayon Sports bazatangira umwiherero ku wa Mbere tariki 2 Ugushyingo 2020, aho bazajya baba i Gikondo mu gihe imyitozo izajya ikorerwa ku kibuga cyo mu Nzove.
Gupimisha abakinnyi n’abakozi biri mu byo komite nshya iyobowe na Rtd. Capt. Uwayezu Jean Fidèle ihereyeho.
Rayon Sports yabaye iya kabiri, inyuma ya APR FC mu mwaka ushize w’imikino, ni yo yari yatwaye Shampiyona ya 2018-2019.
@igicumbinews.co.rw
