Abasesenguzi baravuga ko Pep Guardiola agomba gutwara Champions League kugirango ashimangire ko ari igihangange
Ikipe ya Manchester City ifite igikombe cya shampiyona y’Ubwongereza, kuri ubu iri ku mwanya wa kabiri aho irushwa amanota 22 na Liverpool mu gihe shampiyona isigaje imikino 13 ngo irangire.
Ikipe ya Pep Guardiola izahura na Real Madrid muri kimwe cya 16 cy’igikombe gihuza amakipe yabaye aya mbere mu bihugu byayo ku mugabane w’Uburayi mu mukino uzaba tariki ya 26 Gashyantare 2020.
Manchester city yatsinzwe na Tottenham ibitego bibiri ku busa, mu mukino wabaye ku cyumweru gishize, iyi kipe imaze gutsindwa ibitego 29 mu mikino 25 ya shampiyona mu bwongereza, kuva yatwara igikombe cya shampiyona irusha Liverpool inota rimwe.
Uwahoze ari umukinnyi w’ikipe y’igihugu y’Ubwongereza Ian Wright yavuze ku ikipe ya Manchester City yagize ati:“nta kintu kibi kiraba ku ikipe ya City kuko ntawakwirengagiza ko abakinnyi bayo bingenzi bagize ikibazo cy’imvune, nka Leroy Sane, Aymeric Laporte wavunitse amaze gukina imikino itanu muri shampiyona, hakiyongeraho uwahoze ari kapiteni wabo Vicent Kompany wavuye muri iyi kipe mu mpera z’umwaka w’imikino ushize, byatumye ashyira Frenandinho ndetse na John Stones inyuma nka ba myugariro, muri rusange ntago twamurenganya kuba ari gutsindwa.”
Guardiola ntago yasimbuje Vicent Kompany kubera ko Aymeric Laporte yarakiri muzima, byongeyeho gutwara igikombe cya shampiyona inshuro ebyiri z’ikurikiranya ntago ari ibintu byoroshye, gusa byaba byiza uyu mwaka Guardiola atwaye Champions League.
Pep Guardiola afite iki gikombe inshuro ebyiri kuko yabitwaye ubwo yatozaga ikipe ya Barcelona, aza kunyura mu ikipe ya Bayern Munich gusa ntiyigeze aha aba Bavariya iki gikombe, kubikora muri Manchester City byaba ari ibyingenzi.
DUKUNDANE Ildephonse/igicumbinews.co.rw
