Akababaro kuri Real Madrid itazakinisha Eden Hazard ku mukino wa Champions League
Ku ifoto ni umutoza Zinedine Zidane ari kumwe na Eden Hazard.
Eden Hazard azasiba umukino ikipe ya Real Madrid izakinamo na Manchester City, mu mikino y’amakipe yabaye aya mbere ku mugabane w’Uburayi (Champions League), kubera ikibazo cy’imvune y’akagombambare, yagiriye mu mukino ikipe ya Real Madrid yatsindwagamo na Levante mu mikino ya Shampiyona ya Esipanye, izwi ku izina rya La Liga.
Hazard ukinira ikipe y’igihugu y’Ububirigi (Belgium), yavuye mu mvune icyumweru gishize, aho yari amaze amezi atatu adakina kubera ikibazo cy’imvune n’ubundi y’akagombambari.
Uyu wahoze akinira ikipe ya Chelsea mu kibuga hagati, amaze kugaragara mu kibuga inshuro 15 akinira ikipe ya Real Madrid, kuva yahagera mu mpeshyi y’umwaka washize.
Imvune ya Eden Hazard ngo byaba biteganijwe ko azanasiba umukino wa El Classico. ni umukino Real Madrid izakina na Barcelona ku itariki ya mbere, Werurwe uyu mwaka. Inkomoko y’iyi mvune y’akagombambari, yayigize ubwo yari akiri mu ikipe ya Chelsea mu mwaka wa 2017.
DUKUNDANE Ildephonse/igicumbinews.co.rw
