APR FC yasezerewe muri CAF Champions League rugikubita

Ibitego byo mu minota ya nyuma byatumye APR FC itsindwa na Gor Mahia 3-1, isezererwa ku bitego 4-3 mu ijonjora rya mbere rya CAF Champions League.

APR FC yari yatsinze ibitego 2-1 i Kigali, yagowe n’igice cya mbere cy’umukino wo kwishyura wabereye kuri Nyayo Stadium nyuma yo guhusha penaliti yo mu minota 10 ya mbere yatewe na Tuyisenge Jacques.

Samuel Onyango yafunguye amazamu ku ruhande rwa Gor Mahia ku munota wa 18 mu gihe byasabye APR FC gutegereza umunota wa 86, itsindirwa igitego cyo kwishyura na Nsanzimfura Keddy.

Gor Mahia FC yatsinze ibitego bibiri mu minota ibiri muri itanu y’inyongera, isezerera APR FC. Igitego cya kabiri cyatsinzwe na Sydney Ochieng mu gihe icya nyuma cyinjijwe na Nicholas Kipkirui.

Mu ijonjora rya kabiri, Gor Mahia izahura n’ikipe ikomeza hagati ya CR Belouizdad yo muri Algérie na El Nasr yo muri Libya.

 

Abakinnyi ba Gor Mahia bishimira intsinzi babonye mu minota ya nyuma

 

APR FC yatsindiwe muri Kenya ibitego 3-1

 

@igicumbinews.co.rw