Arsenal ishobora kujya mu mikino ya Champions League mu mwaka utaha
Arsenal ishobora kujya mu mikino ya Champions League umwaka utaha mu gihe shampiyona yaba itarangiye.
Mu nama yabaye ejo ku wa kabiri tariki ya 21 Mata 2020, yahuje amashyirahamwe y’umupira w’amaguru ku mugabane w’uburayi, aya mashyirahamwe yasabwe ko agomba gukora uko ashoboye akarangiza amarushanwa n’ibikombe bikinirwa mu bihugu by’abo.
Mu gihe shampiyona y’Ubwongereza yaba itarangiye, uyu mwaka w’imikino wa 2019-2020 ugakurwaho, byaha ikipe ya Mikel Arteta itike yo kujya mu mikino ya Champions League n’ubwo yicaye ku mwanya wa 9 ku rutonde rwa shampiyona.
Iyo habaye ikibazo gituma shampiyona itarangira, kugirango babone amakipe azitabira imikino yo ku mubagane w’Uburayi bakoresha urutonde rwerekana uko amakipe ahagaze ku mugabane w’Uburayi, ibisubizo babibona barebye champions league na Europa League byabaye mu myaka itanu iba itambutse
Bivuze ngo Arsenal yaza mu myanya y’imbere iri kumwe na Liverpool, Manchester City na Manchester United. Tottenham, Chelsea na Leicester zafata itike izijyana mu mikino ya Europa League zigasimbura Wolves na Shiffield United.
Mu gihe City yaba ikomeje guhanwa bya bihano bayihaye byo kudakina imikino yo ku mugabane w’Uburayi imyaka ibiri, Tottenham yahita ibigiriramo amahirwe kuko yahita iyisimbura.
DUKUNDANE Ildephonse/Igicumbi News
