Burundi: Inzego z'umutekano zarwanye n'inyeshyamba

Ifoto bivugwa ko yafashwe nyuma y’imirwano yo kuwa mbere

BBC yamenye ko kuwa mbere muri komine Bugarama mu ntara ya Rumonge mu burengerazuba bw’u Burundi habaye imirwano yashyamiranyije abapolisi bafatanyije n’ingabo za leta n’itsinda ry’abantu bitwaje intwaro.

Ejo kuwa mbere, mu gace k’ishyamba rya Monge niho habaye imirwano igamije kwirukana izo nyeshyamba bitaramenyekana neza aho zaturutse.

Ku cyumweru, umutwe uvuga ko urwanya ubutegetsi bw’u Burundi witwa Red-Tabara wasohoye itangazo uvuga ko ibirindiro byawo aho “muri komine Bugarama byatewe” n’abasirikare n’abapolisi.

Umuyobozi w’intara ya Rumonge yabwiye BBC ko nta mirwano iri muri iyi ntara, ko “hari agatsinda kahaciye” kandi ko “nako bakirukanye”.

Umwe mu bategetsi muri aka gace utifuje gutangazwa, ejo kuwa mbere yabwiye BBC ko abaturage barenga 10 banyurujwe n’abagabye icyo gitero, muri bo babiri bakabacika bakagaruka.

Uyu yavuze ko hari babiri basanze bakomeretse, ntiyemeje niba muri abo bashimuswe hari abapfuye. Hari amakuru avuga ko abarenga 10 bishwe n’abateye.

Umuvugizi w’igisirikare cy’u Burundi ntiyasubije BBC ku bikorwa bya gisirikare byo kurwanya abo bateye.

Amajwi yatangajwe ku mbuga nkoranyambaga n’abaturage bo muri aka gace, avuga ko abateye bari bitwaje imbunda kandi bagenda barasa, bagasahura abaturage ndetse bakanyuruza bamwe mu baturage.

Itangazo ry’umutwe wa Red-Tabara ryo rivuga ko batewe “bakitabara, bakica abapolisi icyenda n’imbonerakure zigera kuri 20”.

Consolateur Nitunga ukuriye intara ya Rumonge, ihana urubibi n’ikiyaga cya Tanganyika mu burengerazuba, uyu munsi kuwa kabiri yabwiye BBC ko nta mirwano ikiri muri iyi ntara.

Yagize ati: “Abavuga ibyo ni abantu bagomba gusakuza ngo bace umutima abandi, nta mirwano ihari.”

Abajijwe niba nta bateye iyi Ntara yasubije ati: “Hariho agatsinda kahaciye ako nako barakirukanye, nta bindi.”

Ku bivugwa n’inyeshyamba za Red-Tabara ko zifite ibirindiro muri iyi Ntara, Bwana Nitunga yasubije ati: “Nta birindiro bafite [hano] nibajye bareka kubeshya, babifite hehe? nibavuge bati tubifite aha.”

Source:BBC

@igicumbinews.co.rw