Bwa mbere mu Rwanda habonetse abantu benshi banduye Coronavirus mu munsi umwe
Minisiteri y’Ubuzima iratangaza ko kuri uyu wa Gatandatu tariki 22 Kanama 2020, mu Rwanda abantu 109 banduye icyorezo cya COVID-19, mu gihe abandi 42 bakize.
Uyu ni wo mubare munini w’abanduye iki cyorezo ugaragaye ku munsi umwe, kuva cyagera mu Rwanda tariki ya 14 Werurwe 2020.
Abo barwayi bashya 109 barimo 81 babonetse i Kigali (bapimwe mu masoko ya Kigali), 24 babonetse I Rusizi (bapimwe mu bibasiwe kurusha abandi), batatu babonetse muri Huye n’undi umwe wabonetse muri Nyamasheke.
Muri rusange kugeza kuri uyu wa Gatandatu, abamaze kwandura icyo cyorezo ni 2, 889 muri bo abamaze gukira ni 1,754 naho abakivurwa ni 1,124.
Abamaze kwicwa n’icyo cyorezo bose hamwe mu Rwanda ni cumi n’umwe.
Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.
