Chelsea irashaka kugura umukinnyi ukomeye wa Ajax Amsterdam
Ikipe ya Chelsea iri mu biganiro n’umukinnyi wa Ajax Amsterdam Hakim Ziyech
Umutoza w’ikipe ya Chelsea Frank Lampard yashatse kugura uyu mukinnyi w’imyaka 26 y’amavuko mu kwezi kwa mbere, gusa Ajax yanga kumutanga kuko yari iri kwiruka ku gikombe cya shampiyona. Mu gihe Ziyech yari gusinya, yari kuba abaye umukinnyi wa mbere ikipe ya Chelsea iguze, nyuma y’ibihano byo kuyihagarika mu kugura abakinnyi.
Ziyech yagize uruhare mu mukino wahuje Ajax na Chelsea, mu mikino yo mu matsinda ya Champions League, ubwo banganyaga ibitego bine kuri bine mu kwezi kwa 11. Ziyech ukina anyura ku ruhande rw’imbere, abafana ba Chelsea bamwibukira ku mupira w’umuterekano yatereye ahagana muri coruneri, unyura ku muzamu wa Chelsea (Kepa Arrizabalaga), ukubita ku mutambiko w’izamu uragaruka ugwa kuri Kepa uboneza mw’izamu.
Ejo hashize Hakim yakinnye iminota 10 ya nyuma ubwo Ajax yakinaga na Vitesse muri shampiyona y’abaholandi, yakinnye iminota mike kuko yari avuye mu mvune.
Nyuma y’umukino umutoza wa Ajax (Erik ten Hag) bamubajije kuri ibi biri kuvugwa yagize ati:“ntabwo ntunguwe n’amakuru ya Ziyech, ndabizi abakinnyi bacu bazwi n’amakipe akomeye ku mugabane w’Uburayi, maze igihe kinini nzi icyo Hakim ashaka, Chelsea ni ikipe nziza, ni birangira nzishima, ndanezerewe kubwa Hakim kandi ibi nabyo biranshimisha.”
Ziyech ntago ari we gusa ikipe ya Chelsea yashakaga kugura mu kwezi kwa mbere,kuko yanashakaga rutahizamuu wa Paris St-Germain Edison Cavani Ndetse n’undi rutahizamu wa Napoli Dries Mertens, aho umutoza wa Chelsea Frank Lampard yashakaga kubasinyisha.
DUKUNDANE Ildephonse/igicumbinews.co.rw
