Coronavirus: Ikigo cy’Afurika cyo kurwanya indwara gifite impungenge ku bibera muri Tanzania

Umuyobozi mukuru w’ikigo cy’Afurika cyo kurwanya no gukumira indwara (kizwi mu mpine y’Icyongereza ya CDC) yagaragaje impungenge afite ku buryo Tanzania iri kwitwara ku cyorezo cya coronavirus.

Dr John Nkengasong yabwiye ikiganiro Newsday cya BBC ko nta makuru ahagije ikigo ayoboye gifite yo kuba cyashobora kumenya uko ibintu byifashe muri Tanzania.

Yavuze ko iki kigo cyafashyizeho ingamba zihuriweho kuri uyu mugabane w’Afurika zo gushobora gutsinda iyi virusi.

Yagize ati: “Dukomeje kugira icyizere no gusaba Tanzania gutanga amakuru yuko ibintu bihagaze nyirizina kugira ngo dushobore gufatanya mu guhashya iyi virusi kuri uyu mugabane”.

Yagize ati: “Dukomeje gushyikirana [na Tanzania] ariko ntabwo turimo guhabwa igisubizo twiteze”.

Mu kwezi kwa gatandatu, Perezida John Magufuli wa Tanzania yashimangiye ko igihugu cye “cyarokowe” iyi virusi ndetse avuga ko kuri ubu itakiharangwa.

Tanzania iri kwitegura amatora ya perezida ateganyijwe kuba mu kwezi kwa cumi uyu mwaka ndetse iri mu mwuka wo kwizeza ibitangaza kw’abanyapolitike bashakisha amajwi.

Abaturage b’iki gihugu bakomeje kwitabira imirimo yabo, nta kwambara agapfukamunwa cyangwa guhana intera hagati y’umuntu n’undi.

@igicumbinews.co.rw