Coronavirus: Perezida Trump ashaka gutangaza urukingo umujyanama we akabyanga
Inzobere mu bya virusi muri Amerika akaba n’umujyanama w’ibiro bya perezida wa Amerika araburira ku kwihutira gutanga urukingo rwa Covid-19 mbere y’uko rwemezwa ko ari ntamakemwa.
Dr Anthony Fauci yabwiye ibiro ntaramakuru Reuters ko ibyo bishobora no gukoma mu nkokora ikorwa ry’izindi nkingo.
Biravugwa ko Perezida Donald Trump ari kureba uburyo urukingo rwatangazwa mbere y’uko rugeragezwa bya nyabyo.
Iki gikorwa cyamwongerera amahirwe yo kongera gutorwa mu matora y’umukuru w’igihugu mu kwezi kwa 11.
Abo mu ishyaka ry’abademokarate bashinja Bwana Trump kuba yiteguye gushyira ubuzima bw’Abanyamerika mu kaga ku nyungu ze za politiki.
Ku wa gatandatu, Bwana Trump yanditse kuri Twitter ko ikigo cya leta gishinzwe iby’imiti, FDA, kiri “kunaniza kompanyi zikora imiti mu kubona abantu bo kugeragerezaho inkingo”.
Ikinyamakuru Financial Times kivuga ko ubutegetsi bwa Trump buri kureba uko bwemeza mu buryo bwihutirwa ikoreshwa ry’urukingo ruri gukorwa na Kaminuza ya Oxford ifatanyije n’uruganda rukora imiti rwa AstraZaneca.
Abantu bagera ku 10,000 bamaze gukorerwaho igeragezwa ryarwo, ariko inzego z’ubuzima za Amerika zisaba ko rugeragezwa ku bantu nibura 30,000 kugira ngo rwemezwe.
Dr Fauci yavuze iki?
Mu kiganiro na Reuters, Dr Fauci – ukuriye ikigo kitwa National Institute of Allergy and Infectious Diseases – yaburiye ko kwihutisha urukingo rutageragejwe bishobora kwica amagerageza yandi.
Yagize ati: “Ikintu kimwe utakwifuza kubona mu rukingo, ni ukurwemeza mu buryo bwihutirwa mbere y’uko byemezwa ko rukora neza.
“Kimwe mu byago bishoboka mu kwemera urukingo hataragera ni uko bigora, cyangwa bikanahagarika, izindi nkingo kubona abantu bo kuzigeragerezaho.”
“Kuri njyewe, birakwiye kandi ni ngombwa cyane ko habanza kuboneka ko urukingo rwizewe kandi rukora neza.”
Urukingo rwa Kaminuza ya Oxford ni rumwe mu nkingo nyinshi ziri gukorwa ubu ku isi.
Mu byumweru bishize, kompanyi nini zikora imiti zatangije amagerageza manini yo gusuzuma ku bantu niba izo bakoze zikora neza.
Mbere, ikigo FDA cyatanze uruhushya rw’ikoreshwa mu buryo bwihuse (bw’amaburakindi) ry’umuti wa hydroxychloroquine mu kuvura Covid-19 nubwo wari utaremezwa ko uvura neza.
Gusa mu kwezi kwa karindwi iki kigo cyavanyeho urwo ruhushya kivuga ko ubushakashatsi bwerekanye ko uyu muti usanzwe uvura malaria udakora mu kuvura iyi virusi cyangwa mu kurinda abatarayandura.
Bwana Trump yari yarashimagije uwo muti, ahakanya ibyavuzwe n’ikipe y’abajyanama be mu by’ubuvuzi.
@igicumbinews.co.rw
