Rwanda: Coronavirus yongeye kwica abantu benshi ku umunsi umwe
Ministeri y’Ubuzima yatangaje ko Covid-19 yishe abantu 22 barimo abagera ku icumi baguye i Kigali na batandatu b’i Musanze, imibare y’abantu banduye kuri uyu wa Mbere ni 772.
Kurwanya COVID-19 ni intambara ireba buri wese kandi izamara igihe tutazi.
Abantu bapfuye barimo abagore 8 b’imyaka 88, 83, 35 (i Kigali), umwe w’imyaka 82 (i Muhanga), babiri b’imyaka 76, 45 (i Musanze), umwe w’imyaka 60 (i Rubavu), n’uw’imyaka 59 (i Ruhango).
Iki cyorezo cyanahitanye abagabo 14 barimo uw’imyaka 91 (Ruhango), barindwi b’imyaka 85, 62, 61, 55, 39, 38, na 31 (i Kigali), umwe w’imyaka 69 (Rubavu), bane b’imyaka 67, 62, 40, 37 (i Musanze), umwe w’imyaka 61 (i Huye).
Abantu bagera kuri 582 bamaze kwicwa n’iki cyorezo kuva kigeze mu Rwanda muri Werurwe 2020.
Hamaze gufatwa ibipimo 1 730 439 abasanzwemo ubwandu bwa Covid-19 bagera ku 49 016. Abantu barwaye Covid-19 nyuma bagakira bagera ku 33 536 barimo abagera kuri 833 bakize mu masaha 24 ashize.
Mu Rwanda abamaze gukingirwa bageze ku 395 919 barimo 836 bashya. Ubwandu bwa Covid-19 buri ku kigereranyo cya 11.5%.
Kubera umubare munini w’abarembeye mu ngo zabo kuko ubu abarwayi ni 15 078 barimo 70 barembye, iyi Minisiteri isaba abarwariye mu rugo gukora ibishoboka byose bakajya mu byumba byabo bakirinda kwanduza abo babana n’abaturanyi babo.
Minisiteri y’Ubuzima ikomeje kwibutsa Abaturarwanda ko icyorezo cya COVID-19 gihari kandi ko kica. Irabasaba kubahiriza ingamba zashyizweho zo kwirinda Covid-19, zirimo gukaraba intoki neza n’isabune kandi kenshi, kwambara agapfukamunwa neza, guhana intera no kwirinda kujya ahantu hateraniye abantu benshi, no kureka gukora ingendo zitari ngombwa gukaraba intoki ukoresheje amazi meza n’isabune cyangwa imiti yabugewe (Hand sanitizer).
Didier Maladonna/Igicumbi News
Kanda hasi ukurikire ibiganiro tukugezaho ku Igicumbi News Online TV:
