Gakenke: Umugore yiyahuye nyuma yo kumenya ko umugabo we abana n'inshoreke

Ahagana saa mbiri zo mu ijoro ryo ku wa Kabiri tariki ya 10 Nzeri 2024, Mu Mudugudu wa Kibingo, Akagali ka Karyango, Umurenge wa Muyongwe, Akarere ka Gakenke, nibwo Umugore uri mu kigero cy’imyaka 36 yiyahuye kubera Anakimbirane yari afitanye n’umugabo we.

Amakuru bamwe mu baturage baturanye n’uyu muryango bahaye igicumbinewes.co.rw bavuze ko uyu mugore wari ufite uruhinja yiyahuye bitewe n’uko yamenye amakuru y’uko umugabo we bari babyaranye abana bane yari afite undi mugore yari yaracyuye mu murenge wa Kinihira mu karere ka Rulindo.

Umuyobozi w’Akarere ka Gakenke Mukansanga Vestine, yemereye igicumbinews.co.rw iby’urupfu rw’uyu mubyeyi. avuga ko yiyahuye. Ati: “Yari akiri muto!. Bivugwa ko bari bafitanye amakimbirane ariko nabyo turacyabikurikirana kuko abantu babana bose mu makimbirane sibisonuye ko bose bagomba kwiyahura. Ni inkuru ibabaje kuko niyo umugabo mwatongana ntukwiye kwiyahura!.”

Umuyobozi w’Akarere ka Gakenke yasabye abaturage kwirinda amakimbirane cyane cyane ayo mu miryango. Ati: “Icyo tubwira abaturage ni ukwirinda amakimbirane niba anagize agahinda gakabije yakwegera umuyobozi uwariwe wese akamufasha. Ariko ikindi abaturage bacu barasenga ashobora no kwegera yaba ari pasiteri cyangwa se mwarimu w’urusengero cyangwa undi muturage uwariwe wese akamufasha.”

Amakuru umunyamakuru wa igicumbinews.co.rw yahawe n’abaturage ubwo twateguraga iyi nkuru avuga uko umurambo wa nyakwigendera washyinguwe ku gicamutsi cyo kuri uyu wa Gatatu. Uyu mubyeyi asize abana bane barimo n’uruhinja rwari rukiri ku ibere.

Emmanuel Niyonizera Moustapha/Igicumbi News