General Pervez Musharraf wahoze ari perezida wa Pakistan yakatiwe urwo gupfa
Urukiko rwihariye rw’i Islamabad muri Pakistan rwakatiye urwo gupfa General Pervez Musharraf wahoze ari perezida w’iki gihugu.
Uru rubanza rwahereye mu 2013, uyu munsi, uyu mugabo yahamijwe ubugambanyi bukomeye.
Gen Musharraf yafashe ubutegetsi kuri ‘coup d’état’ ya gisirikare mu 1999, aba perezida w’igihugu kuva mu 2001 kugeza mu 2008.
Kuva mu 2016 ari i Dubai nyuma yo kwemererwa kuva mu gihugu ngo ajye kwivuza.
Ibyaha aregwa bishingiye ku kuvanaho itegeko nshinga mu 2007 agatangaza ibihe bidasanzwe mu gihugu mu mugambi wo gushaka kuguma ku butegetsi.
Mu ntangiriro z’uku kwezi, aho ari mu bitaro, Bwana Musharraf yasohoye amashusho (video) avuga ko ibyo aregwa “nta shingiro bifite”.
Niwe mutegetsi wa mbere wa gisirikare muri Pakistan ugejejwe imbere y’ubutabera kubera kurenga ku biteganywa n’itegeko nshinga.
Ibyo aregwa ni ibiki?
Mu kwezi kwa 11/2007 yatangaje ibihe bidasanzwe, ahagarika kubahiriza itegeko nshinga, ibi byateye imyigaragambyo yaguyemo abantu. Mu 2008 yareguye.
Ubwo Nawaz Sharif – mukeba we yavanye ku butegetsi mu 1999 – yatorwaga nka minisitiri w’intebe mu 2013 yahise ashinga urubanza rumurega ubugambanyi.
Kugeza mu 2008 Musharraf yarokotse ibikorwa byinshi byahigiraga kumwica cyangwa kumuhirika ku butegetsi.
Ku rwego mpuzamahanga azwi cyane kuba yarashyigikiye Amerika mu kiswe “intambara ku iterabwoba” nyuma y’ibitero kuri Amerika, nubwo mu gihugu batari babishyigikiye.
Mu 2008 uyu mugabo yavuye mu gihugu, ahagaruka mu 2013 aje kwiyamamaza mu matora y’umukuru w’igihugu ariko urukiko rurabimwangira.
@igicumbinews.co.rw
About The Author
