Ibigwi bya Christiano Ronaldo wujuje imikino 1000 akina umupira w’amaguru
Cristiano Ronaldo uvuka mu gihugu cya porutigari (Portugal), yujuje imikino igihumbi ubwo ikipe ya Juventus yakinaga na Spal muri shampiyona y’Ubutariyani. Ni umukino Ronaldo yatsinzemo igitego, iki kikaba cyabaye igitego cye cya 725 atangiye gukina umupira w’amaguru bya kinyamwuga.
Ronaldo amaze gukina imikino 836 akinira amakipe yagiye anyuramo ndetse n’imikino 164 akinira kipe y’igihugu cye cya Portugal. Yatwaye Ballon d’Or inshuro eshanu kuva aho yatangiye gukina umupira w’amaguru mu ikipe ya Sporting Lisbon yakinnyemo imikino 31 kuva mu mwaka wa 2002 kugeza muri 2003.
Yavuye muri Sporting yerekeza mu ikipe ya Manchester United yo mubwongereza ku myaka 18. Nyuma y’imyaka itandatu akinira United, yerekeje mu ikipe ya Real Madrid yo muri Esipanye. Yakiniye Manchester imikino 292 mbere y’uko yerekeza muri Esipanye mu mwaka wa 2009, aho yahamaze imyaka 9, ahava ajya m’Ubutariyani mu ikipe ya Juventus.
Ronaldo yatsindiye Sporting ibitego 5 mu mikino 31, atsindira Machester United ibitego 118 mu mikino 292 ndetse kandi atsindira Real Madrid ibitego 450 mu mikikino 438, akaba ari nayo kipe yatsindiye ibitego byinshi. Kuri ubu amaze gukina imikino 72 mu ikipe ya Juventus aho amaze kuyitsindira ibitego 53 ndetse n’ibitego 99 amaze gutsindira ikipe y’igihugu cye cya Portugal.
Ikipe Cristiano yatsinze ibitego byinshi kurusha izindi, ni ikipe ya Sevilla kuko amaze kuyitsinda ibitego 27. Naho mu bwongereza ikipe amaze gutsinda ibitego byinshi ni Tottenham aho amaze kuyitsinda ibitego icumi mu marushanwa yose.
Igikombe cye cya mbere yagitwaye ubwo yari ari mu ikipe ya Manchester United ku itariki 22 Gicurasi, umwaka wa 2004, ni mugihe igitego cye cya mbere mu ikipe y’igihugu yagitsinze ubwo Portugal yatsindwaga n’Ubugereki mu mikino y’amatsinda yo kujya mu gikombe cy’Uburayi cya 2004, hari tariki ya 12 Kamena, umwaka wa 2004.
Umukino wa 393 ni wo mukino watangije izina Cristiano mu ikipe ya Real Madrid, ni umukino yatsinze igitego ku munota wa 35 w’umukino, ubwo ikipe ya Real yakinaga na Deportivo La Coruna. Ubwo yari ari mu ikipe ya Real kandi nibwo yatsinze ibitego 3 mu mukino umwe (hatrick), ari mu mikino y’amakipe yabaye aya mbere mu bihugu byayo ku mugabane w’uburayi (Champions League) ubwo Real yakinaga na Ajax Amsterdam.
Umukino wa 921 ni wo watangije izina rye mu ikipe ya Juventus, ubwo batsindaga Sassuolo ibitego 2 kuri kimwe hari tariki ya 16 Nzeri, umwaka wa 2018.
DUKUNDANE Ildephonse/igicumbinews.co.rw
