Ikipe ya FC Barcelona igiye kugurisha izina ry’ikibuga cyayo
Ubusanzwe izina ry’ikibuga cya FC Barcelona ni Camp Nou, ikipe ya Barcelona iri gushaka kugurisha iri zina kugira ngo yongere amafaranga yo kurwanya coronavirus.
Abayobozi b’ikipe batangaje ko amafaranga yose azava mu gutanga uburenganzira bwo kugura iri zina rya Nou Camp, azatangwa mu guhangana n’icyi cyorezo gihangayikishije isi.
Camp Nou ni kimwe mu bibuga binini ku mugabane w’Uburayi, gifite imyanya 99,000 ntikigeze kigira umuterankunga kuva mu mwaka w’1957.
Visi perezida wa Barcelona Jordi Cardoner yagize ati, “turashaka gutanga ubutumwa ku isi hose, umuntu wa mbere uzagira amahirwe yo gushyira izina rye ku kibuga Camp Nou, ayo mafaranga azatangwa ku kiremwamuntu atari Barcelona”.
Bamwe mu bakinnyi ba Barcelona y’abagabo n’abagore, basuye abarwayi mu bitaro byo mu mujyi w’I Barcelona aho bishoboka ko bagera hose barahageze.
Uburenganzira bwo guhabwa izina ry’ikibuga cya Barcelona, buzamara umwaka w’imikino umwe wa 2020-2021, ubundi Barcelona yongere isubirane izina ry’ikibuga cyayo Nou Camp.
Ni ubwa mbere Barcelona itanze uburenganzira bwo gutanga izina ry’iki kibuga mu buryo bw’ubucuruzi.
Ni mugihe abazagura iri zina bashobora kuba abo mu gihugu cya Esipanye cyangwa abo hanze y’igihugu.
DUKUNDANE Ildephonse/Igicumbi News
