Inkongi y’umuriro yibasiye ahavurirwa abanduye Coronavirus abagera ku icumi barapfa

Abarwayi batari munsi ya 10 bapfuye ubwo inkongi y’umuriro yadukaga ku bitaro byakira mu buryo bw’agateganyo abanduye Covid-19 byo mu mujyi wa Vijayawada, mu majyepfo ashyira uburasirazuba bw’Ubuhinde.

Uwo muriro watangiye mu gitondo cyo kuri iki cyumweru kuri hoteli Swarna Palace iri kwifashishwa mu gucumbikira abarwayi ba coronavirus.

Mu gihe cy’iminota 30 abazimya inkongi bari bamaze kuwuzimya. Abategetsi bavuze ko abarwayi bawurokotse bose bajyanwe ku bindi bitaro byo muri uwo mujyi.

Minisitiri w’intebe Narendra Modi yavuze ko “atewe agahinda” n’uwo muriro, ubaye uwa kabiri mu minsi micye ishize wibasiye ikigo kivurirwamo abarwayi ba Covid-19.

Uyu muriro wo kuri iki cyumweru watangiye nyuma gato ya saa kumi n’imwe zaho.

Abarenga 20 bakomeretse, ubu bajyanwe ku bindi bitaro.

Impamvu yawuteye ntizwi. Iperereza ryatangiye.

Minisitiri w’intebe Modi yanditse kuri Twitter ko yifatanyije n’imiryango yagize ibyago.

YS Jagan Mohan Reddy, Minisitiri mukuru muri iyo leta ya Andhra Pradesh, imwe mu zigize Ubuhinde, yamaze kuvuga ko abo mu miryango y’abagizweho ingaruka n’uwo muriro bazahabwa impozamarira ya miliyoni 5 z’ama-rupees.

Ayo arenga miliyoni 64 mu mafaranga y’u Rwanda.

Uyu muriro wadutse nyuma yaho ku wa kane abarwayi umunani bapfiriye mu bitaro byita ku barwaye Covid-19 byo mu mujyi wa Ahmedabad, biturutse ku muriro wadutse mu gice cyabyo cyita ku ndembe.

Umwe mu bakuru bo mu rwego rwo kuzimya inkongi yabwiye BBC ishami ritangaza ibiganiro mu rurimi rwa Gujarati ko uwo muriro wakwirakwiriye uvuye ku mwambaro w’akazi wabugenewe (uzwi nka PPE mu mpine) w’umuganga.

Uwo mwambaro we ngo wahiye kubera ikibazo mu nsinga z’amashanyarazi (cyangwa z’umuyagankuba, mu Kirundi).

Kugeza ubu, Ubuhinde buri ku mwanya wa gatatu ku isi mu bihugu bifite abanduye Covid-19 benshi cyane bamaze gutangazwa.

Bufite abanduye barenga miliyoni 2,1, muri bo abarenga 43,000 yarabishe, nkuko imibare ya Kaminuza ya Johns Hopkins yo muri Amerika ibigaragaza.

Kuri iki cyumweru, mu Buhinde habonetse 64,000 bashya banduye Covid-19, uyu ukaba ari undi muhigo w’abandi benshi cyane babonetse mu munsi umwe.

@igicumbinews.co.rw