Israel igiye gutangira gukingira abantu urukingo rwa kane rwa COVID-19

Israel igiye gutangira gutera abaturage urukingo rwa kane rwa COVID-19 mu rwego rwo gukumira ubwoko bushya bw’iyi Virus bwa Omicron.

Iki cyemezo cyafashwe n’Itsinda ry’Impuguke zigira inama Guverinoma mu bijyanye n’Ubuzima.

Minisitiri w’Intebe wa Israel Naftali Bennett, ejo hashize yagaragaye kuri Televiziyo y’igihugu yemeza iki cyemezo anavuga ko yamaze gusaba inzego z’ubuzima gutangira imyiteguro.

Abaturage bari hejuru y’imyaka 60 n’abakozi bo mu nzego z’Ubuzima nibo bazaherwaho baterwa urukingo rwa kane, ibindi byiciro na byo bikazagenda bikurikiraho.

Ibiro bya Minisitiri w’Intebe byatangaje ko ubukangurambaga bugisaba kwemezwa n’inzego z’ubuyobozi byitezwe ko butangizwa vuba.

Israel iri mu bihugu bya mbere bimaze gukingira umubare munini w’abaturage ku isi ni nyuma y’ubukangurambaga bukakaye bwakozwe mu mpeshyi y’uyu mwaka.

63% by’abaturage b’iki gihugu barakingiwe byuzuye, ni mu gihe 45% babonye urukingo rwo gushimangira, nkuko bitangazwa n’inzego z’Ubuzima.

@igicumbinews.co.rw

Kanda hasi ukurikire ibiganiro tukugezaho ku Igicumbi News Online TV: