Kigali: Abapimwe Coronavirus bari mu nsengero no muri Siporo nta numwe basanze yaranduye
Ikigo cy’Igihugu cy’Ubuzima, RBC, cyatangaje ko ibipimo byafashwe hapimwa abo mu nsengero n’abakoreraga siporo mu Mujyi wa Kigali ku Cyumweru gishize, ari nta n’umwe wasanganywe ubwandu bwa Coronavirus.
Iki gikorwa cyo gupima abayoboke b’amadini atandukanye n’abakorera siporo mu Mujyi wa Kigali, cyakozwe mu rwego rwo gukomeza kugenzura uko icyorezo cya Covid-19 gihagaze mu Mujyi wa Kigali.
Hafashwe nibura ibipimo 400 mu nsengero nka Kiliziya St Michel, EAR Remera na Evangelical Restoration Church Masoro.
RBC yatangaje ko muri ibyo bipimo byose byafashwe, nta n’umwe wasanzwemo Coronavirus. Bitangajwe nyuma y’uko kuri uyu wa Mbere mu bipimo 1988 byafashwe, habonetse umuntu umwe wanduye Coronavirus, ibintu byaherukaga kuba mu mezi asaga ane ashize.
Icyakora n’ubwo imibare y’abandura Coronavirus igenda igabanuka, Minisiteri y’Ubuzima yasabye Abanyarwanda gukomeza gushyira mu bikorwa amabwiriza yo kurwanya ikwirakwira rya Coronavirus.
Kuwa Gatanu ushize, mu kiganiro n’itangazamakuru, Ministiri w’Ubuzima, Dr.Ngamije Daniel, yavuze ko kuba imibare y’abandura Coronavirus igenda igabanuka ari ikimenyetso cyerekana ko abaturage bikubise agashyi, anibutsa abantu ko Coronavirus igihari bityo bakwiriye gukomeza gushyira mu bikorwa ingamba zo kuyirinda.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Kugeza ubu, mu Rwanda ibipimo bya Coronavirus bimaze gufatwa ni 506658. Abantu 3226 mu 4867 bamaze kuyikira, abakiri kuvurwa ni 1612 mu gihe abo iki cyorezo kimaze guhitana ari 29.
@igicumbinews.co.rw
