Wed. Oct 28th, 2020

Kigali: Umugabo w’imyaka 48 yishwe na Coronavirus

Minisiteri y’Ubuzima yatangaje ko kuri uyu wa Gatatu tariki 16 Nzeri 2020, mu Rwanda umuntu wa 23 yishwe na COVID-19, uwo akaba ari umugabo w’imyaka 48 y’amavuko witabye Imana i Kigali.

Hari hashize iminsi irindwi nta muntu bivugwa ko yishwe na COVID-19 mu Rwanda, dore ko uwaherukaga kwicwa n’icyo cyorezo ari umubyeyi w’imyaka 62 witabye Imana i Kigali ku wa Kane tariki 10 Nzeri 2020.

Minisiteri y’Ubuzima kandi yatangaje ko kuri uyu wa Kane habonetse abantu 19 bashya banduye icyorezo cya COVID-19, mu gihe abandi 28 bakize.

Abo barwayi bashya 19 babonetse mu bipimo 2,097, bakaba barimo 13 babonetse muri Kigali (bapimwe mu bibasiwe kurusha abandi), naho abandi 6 baboneka muri Nyamagabe.

Kugeza kuri uyu wa Kane mu Rwanda abamaze kwandura icyo cyorezo ni 4,653 muri bo abamaze gukira ni 2,817 naho abakivurwa ni 1,813.

Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.

@igicumbinews.co.rw

Leave a Reply

Your email address will not be published. Required fields are marked *