Malawi: Abadepite banze imfashanyo y’udukingirizo

Abadepite bo muri Malawi banze imfashanyo y’udukingirizo turenga 200,000 bari bagenewe n’ikigo AIDS Healthcare Foundation cyo muri Amerika cyita ku banduye n’abagizweho ingaruka na SIDA.

Twari gushyirwa mu bwiherero mu nyubako z’inteko ishingamategeko ya Malawi.

Richard Chimwendo, ukuriye abo mu ishyaka rifite ubwiganze muri iyo nteko, yavuze ko abadepite badacyeneye imfashanyo nk’iyo kuko ubwabo bashoboye kwigurira udukingirizo.

Iyo mfashanyo yari yashyikirijwe depite Maggie Chinsinga ukuriye akanama k’imibereho myiza.

Bwana Chimwendo yavuze ko inkuru yasohotse mu kinyamakuru cyo muri Malawi ivuga kuri iyo mfashanyo, yakomerekeje ubushongore n’ubukaka bw’abadepite.

Iyo nkuru y’ikinyamakuru Nation cyo muri Malawi yasubiyemo amagambo ya Madamu Chinsinga avuga ko inteko ishingamategeko isohora udukingirizo hafi 10,000 buri kwezi ndetse ko rimwe na rimwe “tuyishirana mu bubiko”.

Madaliotso Kazombo, wungirije umukuru w’inteko, yahakanye ibikubiye muri iyo nkuru, ndetse asaba ko inteko isabwa imbabazi.

@igicumbinews.co.rw