Iyi nyigo yasohowe mu kinyamakuru Frontier Public Health. Ubusanzwe ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abashakashatsi bavuze ko kwerekana uko ibimenyetso bikurikirana mu kugaragara ku wanduye Coronavirus, bizafasha kuyitahura vuba bityo n’ubuvuzi bwihute.

Inyigo yerekanye ko habanza kugaragara umuriro ku wanduye, ugakurikirwa n’inkorora no kubabara mu ngingo. Ibindi bimenyetso ni nko kugira iseseme no kuruka, bigakurikirwa no gucibwamo (diarrhea).

Umwarimu muri University of Southern California, Peter Kuhn, yavuze ko ’iri tondeke ari ingenzi by’umwihariko kuko bizatuma kuvumbura Coronavirus byihuta ndetse binorohe kuyitandukanya n’ibicurane cyangwa izindi ndwara bijya gusa.’

Ati “Abaganga bashobora kumenya intambwe bakurikiza mu kwita ku barwayi kandi bagafasha umurwayi kutaremba.”

Abashakashatsi basuzumye abarwayi barenga ibihumbi 55 banduye Coronavirus mu Bushinwa bagendeye ku makuru yakusanyijwe n’Ishami ry’Umuryango w’Abibumbye ryita ku buzima (OMS).

Kuva mu mpera z’Ukuboza 2019 ubwo icyorezo cya Coronavirus cyagaragaraga mu Bushinwa, abagera kuri 21,827,459 bamaze kucyandura, abagera ku 773,095 cyarabishe naho 14,564,827 bamaze gukira.

@igicumbinews.co.rw