Menya ukuri ku bihuha bivugwa k’urukingo rwa COVID-19

Ibyo ‘Guhindura DNA’

Ku mbuga nkoranyambaga hari benshi batangaje ko urukingo rwa Covid-19 hari uburyo ruzahindura uturemangingo fatizo tw’umuntu.

BBC yabajije abantu bigenga b’abahanga muri siyansi, bavuze ko urukingo rwa coronavirus rudashobora guhindura ADN y’umuntu.

Zimwe mu nkingo zakozwe zikoresha uduce tw’ibigize virusi ubwayo bita RNA/mRNA.

Prof Jeffrey Almond wo muri kaminuza ya Oxford agira ati: “Gutera RNA mu mubiri w’umuntu nta kintu na kimwe bikora ku turemangingo fatizo tw’umuntu”

RNA ikora mu buryo bwo gutegeka umubiri gukora ‘protein’ iba isa n’iri ku buso(surface) bwa coronavirus.

Ubwirinzi bw’umubiri rero buhita bwiga kumenya no gukora abasirikare barwanya iyo ‘protein’ iba kuri coronavirus, maze iyi yagera mu mubiri nawo ukamenya icyo gukora.

Ibihuha byavugaga ibi binashingira ku kuba ubuhanga bwo gukora inkingo hakoreshejwe RNA/mRNA ari ubwa mbere bukoreshejwe.

Ni ukuri ko nta nkingo z’ubuhanga bwa mRNA zigeze zemezwa mbere y’iki gihe, ariko ubushakashatsi butandukanye ku nkingo za mRNA ku bantu bwarakozwe mu myaka ya vuba ishize.

No kuva iki cyorezo cyatangira izi nkingo zageragejwe ku bantu ibihumbi byinshi ku isi ndetse zaciye mu masuzuma atandukanye y’ubuziranenge.

Nk’inkingo zose nshya, buri bwoko bwarwo bubanza gukorerwa igenzura ry’ubuziranenge mbere y’uko ruterwa abantu benshi.

Mu cyiciro cya mbere n’icya kabiri inkingo zigeragezwa ku bantu bacyeya babyifuje ngo barebe niba ntacyo zitwara kugira ngo bemeze doze nyayo.

Mu cyiciro cya gatatu inkingo zigeragezwa ku bantu ibihumbi bakareba niba zizewe.

Abo bantu baterwa urukingo abandi bagahabwa ikimeze nka rwo ariko kitari rwo (placebo) maze bagakurikiranirwa hafi bareba niba hari ikibazo zibatera.

Igenzura ku buziranenge bw’inkingo rirakomeza na nyuma y’uko zemejwe ngo zihabwe abantu benshi.

Ibivugwa kuri Bill Gates n’akuma gato cyane

Ikindi, ni imyumvire ishingiye ku bihuha byakwiriye isi ko coronavirus ari igikoresho cy’umushinga wo gushyira mu bantu utwuma dutoya cyane (micochips) tubasha gukurikiranwa, kandi ko Bill Gates wa Microsoft ari we ubiri inyuma.

Nta rukingo rwa “microchip” ruriho, kandi nta kimenyetso gihamya ko Bill Gates afite uwo mugambi.

Bill and Melinda Gates Foundation yabwiye BBC ko ibi bivugwa ari “ibinyoma”.

Ibi bihuha byatangiye kuva mu kwezi kwa gatatu umwaka ushize ubwo Bill Gates mu kiganiro yavuze ko amaherezo “tuzagira ibituranga by’ikoranabuhanga” bizerekana abazaba barakize, abapimwe n’abakingiwe. Ntiyigeze avuga kuri ‘microchips’.

Ibyo byatumye hakwirakwira umutwe w’inkuru uvuga ngo: “Bill Gates azakoresha ‘microchip’ mu kurwanya coronavirus.”

Iyi nkuru yavuze ku bushakashatsi bwatewe inkunga na Gates Foundation mu ikoranabuhanga ryatuma amakuru ku rukingo umuntu yahawe abikwa muri wino yashyirwa ku muntu igihe arutewe.

Gusa, iryo koranabuhanga ntabwo ari kariya kuma ka ‘microchip’ ahubwo ni igisa na tattoo itaboneka.

Ntabwo rirakoreshwa kugeza ubu, ariko ntiryatuma umuntu abasha gukurikiranwa kandi amakuru y’umuntu runaka ntiyamuvaho ngo ajye muri database nk’uko Ana Jaklenec, umuhanga muri siyansi uri muri ubwo bushakashatsi abivuga.

Umuherwe Bill Gates washinze kompanyi y’ikoranabuhanga ya Microsoft yagiye avugwaho ibindi bihuha byinshi muri iki cyorezo.

Avugwa cyane kubera ubushake n’uruhare bye mu bikorwa byo gufasha inzego z’ubuzima no gukorwa inkingo.

Nubwo nta bimenyetso by’ibyo bemera, mu kwezi kwa gatanu gushize ibazwa ryakozwe na YouGov ku Banyamerika hafi 2,000 ryerekanye ko 28% muri bo bemera ko Bill Gates ashaka gukoresha inkingo mu gutera abantu ‘microchips’.

Ibihuha byikigereranyo cyo gukira

Hari kandi ingingo irwanya urukingo rwa Covid-19 ikwiriye ku mbuga nkoranyambaga ibaza impambu abantu bacyeneye urukingo mu gihe ibyago byo kwicwa n’iyi ndwara ari bito cyane.

Ifoto ikwirakwizwa n’abarwanya gukingira iriho amakuru ko igipimo cyo gukira Covid-19 ari 99.7%, kandi ko kwandura Covid-19 ari byo byiza kurusha kuyikingirwa.

Icya mbere, iyo foto iriho “ikigereranyo cyo gukira” – bisobanuye ko abo ari abantu banduye Covid-19 bakayikira – kitari ukuri.

Hafi 99.0% by’abandura Covid barayikira, nk’uko bivugwa na Jason Oke, umuhanga mu ibarurishamibare muri kaminuza ya Oxford.

Ni ukuvuga ngo yica abagera ku 100 ku bantu 10,000 bayanduye – imibare iri hejuru cyane ya batatu (3) ku bantu 10,000 nk’uko iriya foto yo ibivuga.

Gusa, Jason Oke yongeraho ati: “Mu banduye bose ibyago byo gupfa biterwa n’ikigero cy’imyaka hatarebwe igihe kirekire cyangwa kigufi iyi ndwara yicamo”.

Kandi ntabwo ari ugukira gusa. Hari abandi bayikira ariko bagakomeza kuzahazwa n’izindi ndwara z’igihe kinini bari bafite.

Ibi bishobora gutuma servisi z’ubuvuzi zuzurirana kubera abarwayi bakirutse Covid barwaye ibindi.

Ibijyanye n’umubare w’abo yica binyuranyije cyane n’impamvu yo gukingira, nk’uko Prof Liam Smeeth wo muri London School of Hygiene and Tropical Medicine abivuga.

Avuga ko urukingo rukwiye gufatwa “nk’umuhate wa sosiyete wo kurinda abandi”.