Menya umuvuno AMAVUBI yakoresheje nyuma yuko Cameroun ivuze ko abakinnyi bayo banduye Coronavirus

Umutoza w’Ikipe y’Igihugu ‘Amavubi’, Mashami Vincent, yavuze ko hari abakinnyi b’Amavubi bashinjwe kwandura COVID-19 mbere yo guhura na Cameroun, ariko bahindura ivuriro rifata ibipimo rikagaragaza ko ari bazima.

Mashami Vincent yabivuze nyuma y’uyu mukino u Rwanda rwanganyijemo na Cameroun ubusa ku busa ku wa Kabiri, rukabura itike y’Igikombe cya Afurika cya 2021.

Amakuru ava mu Ikipe y’Igihugu ‘Amavubi’, avuga ko ku wa Kabiri mu gitondo, babwiwe ko Sugira Ernest, Meddie Kagere na Mutsinzi Ange banduye COVID-19.

Abayoboye delegasiyo y’u Rwanda bigiriye inama yo gushaka irindi vuriro rifata ibipimo by’abo bakinnyi, byagaragaje ko ari bazima ndetse bose bifashishijwe muri uwo mukino.

Mu kiganiro n’abanyamakuru, Mashami Vincent yavuze ko ari ibintu bidakwiye gukomeza kuranga Cameroun nyuma y’uko byanayigaragayeho mbere yo guhura na Repubulika Iharanira Demokarasi ya Congo muri CHAN 2020.

Yagize ati “Ndashimira Cameroun yabonye tike ndetse nk’igihugu kizakira irushanwa, ariko hari ibyo nshaka kuvuga byagakosotse kuko bidakwiye. Twashinjwe kurwaza COVID-19, dushaka irindi vuriro ribifitiye ububasha, abakinnyi dusanga ari bazima. Ibi biteye isoni kuri Cameroun, ntaho bitandukaniye n’ibyabaye mu mezi abiri ashize.”

Mashami yanenze kandi umusifuzi w’Umunya-Niger, Mohamed Ali Moussa, wasifuye umukino w’u Rwanda na Cameroun, ku byemezo bitandukanye yagiye afata.

Ati “Turi hano kugira ngo dukine umukino no guteza imbere umupira wa Afurika, ntabwo ari intambara y’imbunda, ariko urebye uburyo abasifuzi bitwaye hari byo bakoze bidakwiye, ntabwo twabyishimiye.”

Amavubi yasoje umukino ari abakinnyi 10 mu kibuga nyuma y’ikarita itukura yahawe Kwizera Olivier ku munota wa 54, akiniye nabi Moumi Ngamaleu.

U Rwanda rwasoje urugendo rwo gushaka itike y’Igikombe cya Afurika cya 2021, ruri ku mwanya wa gatatu mu itsinda F n’amanota atandatu, rukurikiwe na Mozambique ifite amanota ane.

Cameroun izakira irushanwa ritaha, yayoboye kandi itsinda n’amanota 11, ikomezanya na Cap-Vert yagize amanota 10 nyuma yo gutsindira Mozambique iwayo igitego 1-0.