Nigeria: Perezida Buhari yahaye akazi umuntu wapfuye
Perezida Muhammadu Buhari wa Nigeria yahaye akazi umugabo wapfuye, agira Tobias Chukwuemeka Okwuru umwe mu bagize inama y’ubuyobozi y’ikigo cya leta, hashize amezi abiri apfuye.
Ku wa kabiri w’iki cyumweru, Bwana Buhari yoherereje sena y’iki gihugu ibaruwa yemeza urutonde rw’abantu 37 bashyizwe mu mirimo, ariko atazi ko Bwana Okwuru yapfuye mu kwezi kwa kabiri.
Lauretta Onochie, ukora mu itsinda rishinzwe gutangaza amakuru yo mu biro bya perezida, yavuze ko Bwana Okwuru yari akiriho ubwo Perezida Buhari yamugenaga kuri uwo mwanya.
Yongeyeho ko ndetse Bwana Okwuru yanagiye mu biro bya perezida kunonosora umwirondoro we (CV), “yitegura gutangira akazi, nyuma yo kwemezwa na sena”.
Madamu Onochie yagize ati: “Ubwo rero yapfaga akirindiriye kwemezwa na sena, ayo makuru ntabwo yamenyeshejwe leta”.
Ubu sibwo bwa mbere ibiro bya Perezida Buhari bikoze ikosa rikomeye ryo gushyira umuntu mu mwanya w’akazi kandi yarapfuye.
Mu mwaka wa 2017, Perezida Buhari yashyize abantu bagera kuri batanu mu myanya yo mu nama nyobozi z’ibigo bya leta kandi bari bamaze igihe barapfuye.
@igicumbinews.co.rw
