Nyamasheke: Umuntu wa 5 yishwe na Coronavirus mu Rwanda

Umuntu wa Gatanu yishwe na Coronavirus mu Rwanda kuri uyu wa Gatandatu tariki 18 Nyakanga 2020, abandi 54 barimo 35 bo mu Karere ka Nyamasheke barayandura bituma umubare w’abamaze kwandura iki cyorezo ugera ku 1539.

Minisiteri y’Ubuzima yihanganishije umuryango w’umubyeyi w’imyaka 88 witabye Imana i Nyamasheke yishwe na Coronavirus.

Iyi Minisiteri kandi yatangaje ko mu basanzwemo Coronavirus kuri uyu wa Gatandatu harimo 35 b’i Nyamasheke mu tugari turi mu kato, icyenda bo muri Rusizi, barindwi bo mu Mujyi wa Kigali na batatu bo mu Karere ka Kirehe.

Abanduye ni 1539 (Barimo 54 bashya)

Abakize ni 819 (Barimo 8 bashya)

Abakirwaye ni 715

Abantu batanu bitabye Imana

Ibipimo bimaze gufatwa ni 207 022 (Birimo 3232 bishya)

Kuva umurwayi wa mbere wa COVID-19 iterwa n’agakoko ka Coronavirus agaragaye mu Rwanda ku wa 14 Werurwe 2020, abantu 1539 bamaze kuyisanganwa , muri bo 819 barakize, 715 baracyitabwaho kwa muganga mu gihe batanu bitabye Imana.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

@igicumbinews.co.rw