Perezida Trump yahumurije abanyamerika nyuma yuko Coronavirus yishe umuntu wa mbere muri iki gihugu

Leta Zunze Ubumwe z’Amerika zatangaje ko umuturage wazo wa mbere yishwe na coronavirus imbere mu gihugu, muri leta ya Washington.

Abategetsi bavuze ko uwo murwayi wapfuye ejo ku wa gatandatu yari umugabo wo mu kigero cy’myaka 50 wari ufite n’ubundi burwayi.

Perezida Donald Trump yavuze ko “bishoboka” ko hari abandi bantu banduye ubu bwoko bushya bwa coronavirus bazaboneka, ariko yongeraho ko igihugu cyiteguye uko byagenda kose.

Kuri iki cyumweru, ibihugu bya Australia na Thailand nabyo byatangaje abantu ba mbere bishwe na coronavirus.
Umugabo w’imyaka 78 wo muri Australia yamwishe nyuma yo kuyandura mu kwezi gushize ayanduriye mu bwato Diamond Princess buparitse ku cyambu cyo mu Buyapani.
Thailand, irimo abantu 42 banduye iyi virus, yatangaje ko umugabo w’imyaka 35 wishwe na coronavirus yari arwaye n’indwara yo kubabara mu mitsi no mu ngingo iterwa n’imibu, indwara yitwa ‘dengue fever’.

Amerika yafashe izihe ngamba?

Perezida Trump yashatse gukuraho ubwoba bwa coronavirus, avuga ko “nta mpamvu yo guta umutwe na busa ihari”, ubwo yemeraga ko mu gihugu hitezwe ko hagaragara abandi bantu banduye coronavirus.

Visi-Perezida w’Amerika, Mike Pence, na we yavuze ko uburyo busanzweho mu gihugu, bwo kubuza ko abantu bavuye muri Iran bagera muri Amerika, bwaguwe ubu bukaba bwashyizwemo n’undi munyamahanga uwo ari we wese wageze muri Iran mu minsi 14 ishize.
Iran ni yo yatangaje impfu nyinshi z’abishwe na coronavirus bo hanze y’Ubushinwa yatangiriyemo mu mwaka ushize.

Bwana Pence yanashishikarije Abanyamerika kudasura ibice byo ku isi byibasiwe cyane na coronavirus, byo mu bihugu nk’Ubutaliyani na Koreya y’Epfo.
Kompanyi yo gutwara abantu mu ndege, American Airlines, yavuze ko yahagaritse ingendo zerekeza mu mujyi wa Milan wo mu majyaruguru y’Ubutaliyani.

Iyi kompanyi y’indege yavuze ko izajya ikora urugendo rumwe ku munsi ruva muri Amerika rujya mu Butaliyani, hagati ya Philadelphia n’umujyi wa Roma.

@igicumbinews.co.rw