Perezida Trump yise Covid-19 “Kung Flu” ashaka kuyegeka k’Ubushinwa
Perezida Donald Trump yise Coronavirus “Kung flu”, izina rishya yayihaye ashaka kumvikanisha ko ari virus yakomotse mu Bushinwa, imvugo ikomeje kunengwa n’abantu benshi ko ihembera ibikorwa by’ivangura.
Icyorezo cya Coronavirus kimaze guhitana abantu bagera ku bihumbi 119 muri Leta Zunze Ubumwe za Amerika. Mu bikorwa bya mbere kuva aho iki cyorezo cyibasiye igihugu cye byo kwiyamamaza ku mwanya w’Umukuru w’Igihugu mu matora ateganyijwe mu Ugushyingo, byabereye mu Mujyi wa Tusla muri leta ya Oklahoma, ababishinzwe batanze udupfukamunwa mu bantu bari bitabiriye ariko bake nibo batwambaye.
Trump yanenzwe ku bwo guhuriza abantu benshi hamwe muri stade ku buryo bishobora gukwirakwiza Coronavirus. Yavuze ko impungenge zagizwe kuri iki gikorwa zari zikwiye kuba zaranagizwe ku myigaragambyo yadutse mu gihugu mu minsi ishize yamagana ubugizi bwa nabi bwa polisi kuko ngo nayo yahuruzaga abantu benshi.
Ati “Ntushobora kubumva bavuga ngo ntabwo bambaye udupfukamunwa.”
Ni mu gihe ubushakashatsi bwakunze kugaragaza ko haba hari amahirwe menshi kuba abantu bari ahantu hamwe hafunganye bashobora kwandura Coronavirus kurusha abari hanze.
Trump yakomeje avuga ku ijambo Covid-19, risobanura Coronavirus Disease 2019, rikoreshwa nk’impine y’agakoko gatera iyi ndwara ka SARS-CoV-2. Yavuze ko ari izina ryahawe iyi virus rigakwira ku Isi hose mu kwirinda kuyita virus y’Abashinwa.
Ati “Ni icyorezo gifite amazina menshi, gifite amazina menshi kurusha ibindi byorezo mu mateka. Nacyita Kung Flu. Natanga amazina 19 atandukanye.”
Kung Flu, izina rishya Trump yahaye Covid-19, rininura u Bushinwa busanzwe bufite imirwano ishingiye kuri gakondo yitwa Kung fu.
@igicumbinews.co.rw
