Robertinho wigeze gutoza Rayon Sports yagizwe umutoza wa Gor Mahia
Umunya-Brésil Roberto Oliveira Gonçalves do Carmo ‘Robertinho’ wigeze gutoza Rayon Sports, yagizwe umutoza mushya wa Gor Mahia yo muri Kenya, ku masezerano y’umwaka umwe.
Gor Mahia nta mutoza yari ifite nyuma y’uko Umwongereza Steven Polack yerekeje muri Finland ku wa 12 Nzeri, mu gihe ku wa Kane tariki ya 8 Ukwakira yandikiye iyi kipe asezera ku mirimo ye.
Mu gitondo cyo kuri uyu wa Gatandatu nibwo Ubuyobozi bwa Gor Mahia bwemeje ko umutoza mushya wahawe akazi ari Oliveira Gonçalves do Carmo ‘Robertinho’ w’imyaka 60, ufite ubunararibonye bwo gutoza muri Afurika kuva mu myaka 15 ishize.
Yatoje muri Tunisie, Angola ndetse no mu Rwanda aho yari muri Rayon Sports.
Robertinho yagize ati “Gor Mahia ni ikipe ifite ibigwi imbere mu gihugu, ni umwanya mwiza wo kubakana nayo ibindi bigwi mu marushanwa ya CAF.”
Uyu mugabo watangiye gutoza mu 2002, yageze mu Rwanda muri Kamena 2018, ahabwa amasezerano y’amezi atandatu yongerewe mu Ukuboza 2019.
Yafashije Rayon Sports gukora amateka yo kugera muri 1/4 cya CAF Confederation Cup, agera muri 1/4 cya CECAFA Kagame Cup yabereye muri Tanzania, atsindirwa ku mukino wa nyuma w’Igikombe cy’Amahoro 2018 mbere yo kwegukana Shampiyona y’umwaka ushize wa 2018/19.
Muri Nyakanga 2019, Robertinho yagarutse gutoza Rayon Sports ariko atandukana nayo nyuma y’ibyumweru bitatu gusa kubera kutubahiriza ibyo yayisabaga.
@igicumbinews.co.rw
