Bruno Fernandes yasinyiye ikipe ya Manchester United
Umukinnyi wo hagati mu kibuga wakinaga mw’ikipe ya Sporting Lisbon yo muri Portugal, yamaze gushyira umukono ku masezerano azamugeza muri 2025, ariko akaba afite uburenganzira bwo kuyongera mu ikipe ya Manchester United.
uyu musore w’imyaka 25 yatanzweho asaga miliyoni 55 z’amayero gusa bumvikanye ko United izatanga aya mafaranga mu byiciro. United nijya mu mikino ya Champios League izatanga miliyoni 5 z’amayero, Bruno niyitwara neza bazongeraho izindi miliyoni 5 z’amayero, muri rusange aya mafaranga azagenda yiyongera kugeza kuri miliyoni 80 z’amayero bitewe n’ibyo bumvikanye.
Ntago ari ubwa mbere United iguze umukinnyi muri Sporting kuko Fernandes aje akurikira abakinnyi nka Cristitiano Ronaldo, Nani ndetse na Marcos Rojo. Akaba ariwe mukinnyi uje mu bwongereza ahenze muri iri soko ry’igura n’igurisha ryo muri uku kwa mbere kwa 2020.
Umwaka w’imikino wa 2018-2019, Bruo yatsinze ibitego 64 mu mikino 137 mu marushanwa yose ikipe ya Lisbon yakinnye, atorwa nk’umukinnyi w’umwaka w’imikino wa 2017-2018 ndetse nuwa 2018-2019 muri Portugal.
Bruno amaze gushyira umukono ku masezerano yagize ati:“urukundo rwanjye kuri Manchester United rwatangiye ubwo nabonaga Cristiano Ronaldo akina hano, nabaye umufana ukomeye w’iyi kipe ikomeye, nakoze cyane kugirango iki gihe kigere ndasezeranya abafana ko nzatanga buri kimwe kugirango tubone intsinzi n’ibikombe.”
Yakomeje agira ati: “ndashimira Sporting kubwa buri kimwe bankoreye, nukuri ni byiza kumva amagambo bamvuzeho ubwo nari ndi umukinnyi wabo.”
Umutoza Solskjaer nawe ntiyaripfanye yagize ati:“ibitego ndetse n’imipira ivamo ibitego bya Bruno birivugira, uyu ni inyongera nziza ku ikipe yacu, azadufasha kwigira imbere muri iki kiciro cya kabiri cya shampiyona.”
DUKUNDANE Ildephonse/igicumbinews.co.rw
