Rwanda: Abanduye Coronavirus biyongereye bidasanzwe
Raporo ya Minisiteri y’Ubuzima iragaragaza ko kuri uyu wa gatandatu tariki 13 Kamena 2020 mu Rwanda habonetse abarwayi bashya mirongo itatu n’umwe (31) ba COVID-19.
Ni bwo bwa mbere hagaragaye abarwayi benshi ku munsi umwe, kuva iki cyorezo cyagaragara bwa mbere mu Rwanda, tariki ya 14 Werurwe 2020.
Minisiteri y’Ubuzima ivuga ko abo barwayi bashya ngo bagaragaye muri Rusizi na Rusumo, igasaba Abaturarwanda bose gukomeza kwitwararika.
Abarwayi babonetse kuri uyu munsi babonetse mu bipimo 2,043 byafashwe uyu munsi, naho ibimaze gufatwa byose hamwe ni 87,656. Abamaze kuboneka mu Rwanda banduye icyo cyorezo bose hamwe ni 541, abakize bashya ni 11, abamaze gukira bose hamwe baba 332, naho abakirwaye ni 207.
Ni mu gihe abamaze kwicwa n’icyo cyorezo mu Rwanda ari babiri.
About The Author
