Rwanda: Abanduye Coronavirus biyongereye bidasanzwe

Minisiteri y’Ubuzima yatangaje ko abantu 41 basanganywe Coronavirus mu bipimo 3116 byafashwe uyu munsi bituma abayanduye mu Rwanda bagera kuri 702 mu gihe abakize biyongereyeho batandatu bituma abamaze gusezererwa mu bitaro baba 357.

Abanduye ni 702 (Barimo 41 bashya)
Abakize ni 357 (Barimo batandatu bashya)
Abakirwaye ni 343
Abantu babiri bamaze kwitaba Imana
Ibipimo bimaze gufatwa ni 108 005 (Ibipimo bishya 3116)

Itangazo rya Minisiteri y’Ubuzima ryo kuri uyu wa 20 Kamena 2020 rigaragaza ko abarwayi bashya basanganywe ubwandu bwa Coronavirus ‘bagaragaye muri Rusizi na Rusumo.’

Ni ku nshuro ya kabiri mu Rwanda habonetse umubare munini w’abarwayi bashya kuva Coronavirus yaboneka mu Rwanda. Ku wa 14 Kamena 2020 hari hagaragaye abarwayi bashya 41 basanganywe Coronavirus, bose bakuwe mu Karere ka Rusizi.

Kuva ku wa 31 Gicurasi 2020, Akarere ka Rusizi kabaye izingiro rya Coronavirus mu Rwanda, nyuma y’uko abantu batanu ba mbere bagaragaweho iki cyorezo barimo abacuruzi, abashoferi batwara ibintu babivanye cyangwa babijyanye i Bukavu muri Repubulika Iharanira Demokarasi ya Congo ndetse n’umumotari umwe watwaraga ibintu byari byemewe.

Ubwandu bushya buboneka ku butaka bw’u Rwanda bufitanye isano n’abakora ingendo zambukiranya imipaka, irimo uw’u Rwanda na Repubulika Iharanira Demokarasi ya Congo mu Karere ka Rusizi n’uwa Rusumo mu Karere ka Kirehe.

Kuva umurwayi wa mbere wa Coronavirus agaragaye mu Rwanda ku wa 13 Werurwe 2020, hamaze kuboneka 702 banduye mu bipimo 108 005 bimaze gufatwa, 357 barayikize mu gihe 343 bakiri kwitabwaho n’abaganga; babiri barimo umushoferi w’imyaka 65 n’umupolisikazi bitabye Imana.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 8 859 147 bamaze kuyandura ku Isi yose, barimo 464 816 yahitanye mu gihe 4 717 323 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

@igicumbinews.co.rw