Rwanda: Abantu 6 barimo uruhinja rw’amezi abiri bishwe na Coronavirus

Abantu batandatu barimo n’uruhinja bishwe na Coronavirus bituma umubare w’abamaze guhitanwa n’iki cyorezo mu Rwanda uba 388.

Itangazo rya Minisiteri y’Ubuzima ryo kuri uyu wa 21 Kamena 2021 ryagaragaje ko ku nshuro ya mbere mu bahitanywe na Cronavirus harimo n’uruhinja rw’amezi abiri.

Rikomeza riti “Twihanganishije imiryango y’uruhinja rw’amezi (umukobwa), umugore w’imyaka 40, umugabo w’imyaka 37 (i Kigali), abagore babiri b’imyaka 84 na 75 (i Rubavu) n’umugabo w’imyaka 36 (i Huye) bitabye Imana.’’

Abanduye Coronavirus biyongereyeho 622 mu masaha 24 ashize, bakuwe mu bipimo 5.342 byafashwe. Umujyi wa Kigali ni wo wihariye abarwayi benshi kuko wasanzwemo 305, Kamonyi ni 40, Rubavu 35, Gicumbi 27, Nyabihu na Burera ni 24, Rwamagana 22, Musanze 21 mu gihe Rutsiro na Rulindo habonetse 17.

Iyi mibare y’abarwayi bashya yatumye umubare w’abamaze gusanganwa Coronavirus kuva yagera mu Rwanda muri Werurwe 2020 uba 31.435 mu bipimo 1.556.862.

Kuri uyu wa Mbere nta murwayi mushya wakize byatumye abamaze gukira baguma ku 26.704. Abarwayi bakiri kwitabwaho byihariye baba abarwariye mu bitaro n’abari mu ngo zabo ni 4343 barimo 13 barembye.

Abantu 247.087 ni bo bamaze guhabwa doze ya kabiri y’urukingo rwa COVID-19 (AstraZeneca). Muri rusange kuva ibikorwa byo gukingira byatangira ku wa 5 Werurwe 2021, abantu 390.848 ni bo bahawe urukingo mu Rwanda.