Rwanda: Abantu banduye Coronavirus bamaze kuba batanu
Kuri iki cyumweru tariki 15 werurwe 2020 Minisiteri y’Ubuzima yasohoye itangazo rivuga ko mu Rwanda hari abantu bane banduye Coronavirus .
Abanduye barimo “Umunyarwanda ufite imyaka 34 wageze mu Rwanda ku wa 6 Werurwe 2020 aturutse muri Sudani y’Epfo”
Rivuga ko undi ari “Umuvandimwe we ufite imyaka 36 wageze mu Rwanda ku wa 8 Werurwe 2020 aturutse mu Birwa bya Fiji anyuze muri Amerika na Qatar; umugabo w’Umunyarwanda ufite imyaka 30 udaherutse kugira ingendo mu mahanga n’umusore w’imyaka 22 ufite ubwenegihugu bwa Uganda wageze mu Rwanda ku wa 15 Werurwe 2020 aturutse i Londres mu Bwongereza.’’
Abo barwayi bari kuvurirwa ahabugenewe hanashakishwa abantu bose bahuye na bo kugira ngo basuzumwe ndetse bitabweho n’inzego z’ubuzima.
Minisiteri y’Ubuzima yasabye abaturarwanda gukomeza gukurikiza amabwiriza atangwa n’ubuyobozi bw’urwego rw’ubuzima cyane cyane gukaraba intoki igihe cyose, kutajya ahantu hahurira abantu benshi no kumenyesha inzego zibishinzwe igihe ibimenyetso by’iyo ndwara byagaragaye hakoreshejwe umurongo wa telefoni itishyurwa 114 cyangwa bakabimenyesha umujyanama w’ubuzima.
Aba baza bakurikira undi muhinde nawe basanzemo Coronavirus nkuko biri mu itangazo minisiteri y’Ubuzima yasohoye kuri uyu wa Gatandatu.
Kugeza ubu mu Rwanda abanduye coronavirus bamaze kuba batanu.
BIZIMANA Desire/Igicumbi News
About The Author
