Rwanda: Hari abantu bakingiwe bishwe na Coronavirus

Ikigo cy’Igihugu cy’Ubuzima, RBC, cyatangaje ko abantu batatu mu bahawe urukingo rwa Covid-19 bari basanganywe izindi ndwara zikomeye bahitanywe n’iki cyorezo.

Umuyobozi wa RBC, Dr Sabin Nsanzimana, yabwiye TV1 ko abarwayi batatu bahitanywe na Covid-19 bari baranduye indwara zikomeye zirimo kanseri.




Yagize ati “Hari abantu batatu bahawe urukingo rwa Covid-19 bitabye Imana ariko nta gikuba cyacitse kuko bari basanzwe bafite uburwayi bukomeye. Urugero umwe muri bo yari afite kanseri yo ku gipimo cyo hejuru, undi nawe yari afite indwara y’umutima.’’

Yasobanuye ko urukingo ruha umubiri w’uwaruhawe ubudahangarwa kuri Covid-19 ariko ntirwamubuza guhitanwa nayo.




Yakomeje ati “Ntitwavuga ko bahitanywe nayo kuko izo ndwara zari zibarembeje.’’

Dr Nsanzimana yavuze ko abantu bakwiye gukomeza kubahiriza amabwiriza yo kwirinda kuko guhabwa urukingo bidakuraho ko umuntu yakwandura cyangwa ngo yanduze mugenzi we.

Ati “Twagaragaje imibare ko abantu 400 bakingiwe Covid-19 banduye, icyo bahuriyeho bose ntibaremba, icyiciro cyabo kinini bari barafashe urukingo rwabo rwa mbere bategereje urwa kabiri. Guhabwa urukingo rwa kabiri kandi ntibiguha ubudahangarwa ijana ku ijana ko Covid-19 utahura nayo, nta rukingo rwizewe ijana ku ijana turabona ku buryo abantu bakwirara.”

Yasabye abadohoka ku mabwiriza yo kwirinda ikwirakwira rya Covid-19 bagatera ishoti ibyo kwambara agapfukamunwa bitwaje ko bakingiwe kwitwararika kuko bashobora kwandura no kwanduza abandi nubwo nta bimenyetso bagaragaza cyangwa ngo barembe.

Amakuru y’abantu bakingiwe ariko bakitaba Imana yatangajwe mu gihe ubwandu bwa Covid-19 bukomeje kwiyongera ku kigero cyo hejuru.

Imibare ya Minisiteri y’Ubuzima yo ku wa 22 Kamena 2021, yerekanye ko uwo munsi gusa habonetse abarwayi 861 mu bipimo 7.624 mu gihe abarwayi bane bahitanywe n’iki cyorezo mu masaha 24.

Kuva ibikorwa byo gukingira Coronavirus mu Rwanda bitangiye ku wa 5 Werurwe 2021, abagera ku 391.001 ni bo bamaze guhabwa inkingo za COVID-19 zo mu bwoko bwa AstraZeneca na Pfizer.

@igicumbinews.co.rw