Rwanda: Umuntu wa 57 yishwe na Coronavirus

Minisiteri y’Ubuzima yatangaje ko umuturage wo mu Karere ka Rubavu yishwe na COVID-19, aba umuntu wa 57 uhitanywe n’iki cyorezo ku butaka bw’u Rwanda.

Itangazo rya Minisante ryerekana ko uwitabye Imana kuri uyu wa Kabiri, tariki ya 15 Ukuboza 2020, ari ‘umugabo w’imyaka 70 w’i Rubavu.’

Mu bipimo bishya 2294 byafashwe kandi hasanzwemo abantu 85 banduye COVID-19 iterwa n’agakoko gashya ka Coronavirus mu gihe 40 aribo bayikize mu masaha 24 ashize.

Abarwayi bashya bagaragaye muri “Kigali: 30 (abagenzi binjira mu gihugu, bahise bashyirwa mu kato), Musanze: 39 (Itsinda ry’abibasiwe kurusha abandi), Rubavu: 8, Karongi: 3, Rusizi: 3, Ruhango: 1 na Huye: 1.’’

Kuva muri Werurwe ubwo umurwayi wa mbere yabonekaga mu gihugu, hamaze gufatwa ibipimo bya Coronavirus 673 517, hasanzwemo abantu 6832 banduye. Muri bo 6036 basezerewe mu bitaro nyuma yo gupimwa bagasangwa nta bwandu bagifite mu gihe 739 bakiri kwitabwaho.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

15.12.2020 Amakuru Mashya | Update

*Kigali: 30 (Abagenzi binjira mu gihugu, bahise bashyirwa mu kato), Musanze: 39 (Itsinda ry’abibasiwe kurusha abandi), Rubavu: 8, Karongi: 3, Rusizi: 3, Ruhango: 1, Huye: 1 pic.twitter.com/MMgz9OKO3Q

— Ministry of Health | Rwanda (@RwandaHealth) December 15, 2020