Rwanda: uyu munsi habonetse abanduye Coronavirus 13
Abantu 13 basanganywe Coronavirus mu bipimo 1705 byafashwe uyu munsi bituma umubare w’abanduye mu Rwanda ugera kuri 225, mu gihe abakize biyongereyeho batatu baba 98.
Kuva umuntu wa mbere urwaye Coronavirus abonetse mu Rwanda ku wa 14 Werurwe 2020, abanduye bamaze kuba 225 mu gihe 98 bamaze gukira ndetse banasezerewe mu bitaro nyuma yo gusuzumwa, ibipimo bikerekana ko nta bwandu bagifite mu mibiri yabo.
Minisiteri y’Ubuzima yatangaje ko kuri uyu wa Gatatu, tariki ya 29 Mata 2020 abantu ‘13 bashya’ basanganywe Coronavirus mu bipimo 1705 byafashwe mu gihe batatu basezerewe mu bitaro.
Abasanganywe ubwandu biganjemo abakora mu bijyanye n’ubwikorezi cyane mu ‘batwara amakamyo yambukiranya imipaka n’abo bakorana’.
Kugeza ubu abarwayi 127 baracyari kwitabwaho n’abaganga mu bitaro kandi ‘bose bavurirwa ahantu habugenewe kandi boroherwa.’ Nta n’umwe uraremba cyangwa ngo yitabe Imana.
Minisiteri y’Ubuzima ivuga ko abaturage bakwiye gutanga amakuru kugira ngo uwahuye n’uwanduye Coronavirus yitabweho bikwiye.
Iti ‘‘Umuntu wese wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byayo aba ashyize ubuzima bwa benshi mu kaga kandi abihanirwa n’amategeko.’’
Mu rwego rwo kwirinda ikwirakwira ry’icyorezo cya COVID-19 giterwa n’agakoko gashya ka Coronavirus, Guverinoma y’u Rwanda yafunze utubari, amashuri, insengero, inama n’ibindi bikorwa bihuza abantu benshi ndetse abaturage basabwa kuguma mu ngo zabo mu gihe batagiye gushaka serivisi za ngombwa zirimo guhaha, kwivuza n’izindi. Ni ingamba zigomba kubahirizwa kugeza ku wa 30 Mata 2020.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 3 190 584 bamaze kuyandura ku Isi yose, barimo 225 857 yahitanye na 986 725 bamaze kuyikira.
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kuguma mu rugo, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.
Umuntu wese ashobora kwipimisha akoresheje telefoni akanda *114# agakurikiza amabwiriza. Ugaragaza ibimenyetso bya Coronavirus asabwa guhamagara telefoni itishyurwa ya 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.
@igicumbinews.co.rw
About The Author
