Ubushinwa bwafunze BBC

Ubushinwa bwahagaritse Radio na televiziyo bya BBC muri icyo gihugu, nk’uko byatangajwe n’abashinzwe ubugenzuzi muri icyo gihugu ejo kuwa kane.

Ubushinwa bunenga uko BBC yatangaje coronavirus n’ihohoterwa rikorerwa abaturage bo mu bwoko bwa Uighurs.

BBC ivuga ko iki ari icyemezo “kibabaje”.

Ibi bikurikiranye n’uko OFCOM, urwego rugenzura itangazamakuru mu Bwongereza, rwambuye uburenganzira bwo kuhakora igitangazamakuru cya leta y’Ubushinwa China Global Television Network’s (CGTN).

Umwanzuro wa OFCOM mu ntangiriro z’uku kwezi, wafashwe nyuma yo gusanga icyemezo cyo gukora cyahawe CGTN cyakoreshwaga mu buryo butemewe n’amategeko n’ikigo Star China Media Ltd.

Mu cyemezo cyabo, urwego rwa leta rushinzwe ubugenzuzi bwa film, televiziyo na radio mu Bushinwa, rwavuze ko ibitangazwa na BBC World News ku Bushinwa “binyuranyije bikomeye” n’amabwiriza yo gutangaza, arimo “kuba inkuru ari ukuri, zitabogamye” kandi “zitabangamira inyungu z’Ubushinwa”.

Uru rwego rwavuze ko ubusabe bwa BBC bwo gukorera muri iki gihugu uwundi mwaka butazemerwa.

Mu itangazo, BBC, yavuze ko “Ibabajwe n’uko abategetsi b’Ubushinwa bahisemo gufata iki cyemezo. BBC ni igitangazamakuru mpuzamahanga cyizewe kurusha ibindi gitangaza amakuru yo ku isi akwiye, atabogamye kandi nta bwoba.”

Sheni ya BBC World News TV mu Bushinwa yari isanzwe isa n’ibujijwe, iboneka gusa mu mahoteli mpuzamahanga no mu bigo by’abahagarariye ibihugu, bivuze ko Abashinwa benshi batayireba.

Mu Bushinwa, website ya BBC na ‘applications’ zayo zisanzwe zarafunzwe.

Dominic Raab ushinzwe ububanyi n’amahanga bw’Ubwongereza, yavuze ko icyemezo cy’Ubushinwa ari ikintu “kidakwiriye cyo guhonyora ubwisanzure bw’itangazamakuru.”

Ibiro by’ububanyi n’amahanga bya Amerika byamaganye icyemezo cy’Ubushinwa, bucyita kimwe mu mugambi mugari wo kwigizayo itangazamakuru ritabogamye mu Bushinwa.

Imibanire y’Ubushinwa n’ubwongereza mu mezi ashinze yabaye mibi cyane kubera Hong Kong, aho leta ya Beijing yatangije itegeko ry’umutekano ritavugwaho rumwe kubera inkubiri y’abashyigikiye demokarasi.

Mu kwezi kwa mbere, Ubwongereza bwashyizeho Visa nshya iha abaturage miliyoni 5.4 ba Hong Kong uburenganzira bwo kuba mu Bwongereza no kuba Abongereza, kuko butekereza ko Ubushinwa bubangamiye uburenganzira n’ubwisanzure bwaho.

Hong Kong yahoze ari agace gakolonijwe n’Ubwongereza.

Mu kwezi kwa kabiri, BBC yatangaje raporo irimo ibiganiro by’abagore bo mu bwoko bw’aba Uighur bavuga uko bagiye bafatwa ku ngufu n’uko bakorewe iyicarubozo mu nkambi zo kugorora” za leta mu ntara ya Xinjiang.

Minisiteri y’ububanyi n’amahanga y’Ubushinwa yavuze ko BBC yakoze “raporo mpimbano”.

Imibare itandukanye ivuga ko abantu barenga miliyoni b’aba Uighurs bafungiwe muri biriya bigo bya leta y’Ubushinwa.

Mu kwezi gushize, leta ya Amerika yavuze ko Ubushinwa bwakoze jenoside ku baturage babwo b’aba Uighurs n’abandi b’ukwemera kwa Islam.

Ubushinwa buhakana ko aba-Uighurs bahohoterwa.

Umwaka ushize, uhagarariye Ubushinwa mu Bwongereza yabwiye BBC ko raporo zivuga kuri ibyo bigo ari “fake” kandi aba-Uighurs bafatwa kimwe n’ayandi moko y’abantu mu Bushinwa.

@igicumbinews.co.rw